24 մլն դրամ վճարելու պարագայում պարտադիր զինծառայությունը երկու տարվա փոխարեն 4,5 ամիս դարձնելը պոպուլիստական քայլեր է իրենց իշխանությունը պահելու համար: Նմանատիպ այլ նախագիծ էր կար՝ 2 տարի պարտադիր ծառայությունը դարձնել 1,5 տարի, իսկ մեր ժողովուրդը կուրորեն հավատում է այդ քայլերին։ Այս մասին MediaHub.am-ի հետ զրույցում ասաց «Հայաստան» խմբակցության ղեկավար, ՀՀ ԶՈՒ գեներալ-գնդապետ, պաշտպանության նախկին նախարար Սեյրան Օհանյանը՝ խոսելով Հայաստանի պաշտպանության նախարարությունը նոր նախագծի մասին։ 

«Նախագիծը երեկ է շրջանառության մեջ դրվել, դեռ ամբողջովին չեմ ուսումնասիրել, ուսումնասիրելուց հետո վերջնական մեր կարծիքը կհրապարակենք։ Բայց այս նախագիծը մեկ բանի մասին է խոսում՝ այս իշխանությունը չի գիտակցում պահի կարևորությունը, չի գիտակցում գերակա խնդիրները, որովհետև ի վիճակի չեն մեր պետության, Հայաստանի և Արցախի շուրջ ստեղծված անվտանգության միջավայրի ռազմաքաղաքական իրավիճակին համահունչ որոշումներ ընդունել։ Անկախության և անվտանգության անկման այսպիսի պայմաններում, այս սպառնալիքների, վտանգների առկայության պայմաններում ծառայության վերաբերյալ որոշումները ոչ թե պետք է լինեն հեշտացնելու, այլ հակառակը՝ խստացնելու ուղղությամբ»,-նշեց նա։

Օհանյանի խոսքով՝ սա հարված է երկրի ռազմահայրենասիրական դաստիարակությանը։
«Սա հարված է հայրենասիրությանը, հարված է սոցիալական արդարությանը և բացասական անդրադարձ է ունենալու բանակի բարոյահոգեբանական վիճակին, որն էլ իր հերթին ևս մեկ աստիճանով քայքայելու է բանակի մարտունակության վիճակը։ Եվ հաջորդ կետը, որ պետք է ընդգծել, այն է, որ իշխանությունները մտածում են՝ այս քայլով կարող են գումարներ հայթհայթել և պայմանագրային ծառայությունն ընդլայնել։ Այստեղ գալու է կրկին այն կարծիքը, որ հարուստներն ազատվելու են, սոցիալապես անապահովները՝ ծառայելու։ Հարուստների դեմ ոչինչ չունեմ, իրենց բիզնեսի հաշվին է, որ հարկեր են վճարվում, երկիր զարգանում, բայց մենք ունենք օրենք, որտեղ հստակ գրված է՝ յուրաքանչյուր 18 տարեկանը լրացած արական սեռի ներկայացուցիչ պետք է իր ծառայությունը մատուցի հայրենիքին»,-շեշտեց Օհանյանը։ 

Պաշտպանության նախկին նախարարի դիտարկմամբ՝ արդարությունը խաթարվելու է, իսկ այդ գումարները չեն ուղղվելու արհեստավարժ բանակ ունենալուն։ «Պրոֆեսիոնալ բանակ ունենալու համար գումար հայթհայթելու տարբերակներ հենց հիմա կարող եմ ասել, օրինակ՝ պետության արդյունավետ կառուցվածք, որը չունենք, պետության բյուջեի արդյունավետ բաշխում և աշխատավարձերի ու պարգևավճարների միջև մեծ տարբերության կրճատում։ Այսօրվա իշխանությունները երկիրը բերել են մի աղետալի վիճակի ու իրենց աշխատասենյակներում բարձր աշխատավարձ ու բարձր պարգևավճարներն են վայելում»,-ամփոփեց գեներալ-գնդապետը։ 

Լիաննա Թորոսյան