Սաուդյան Արաբիան ոչ միայն հարթակ է տրամադրելու Ռուսաստանի և ԱՄՆ պաշտոնյաներին առաջիկա բանակցությունների համար, այլև մտադիր է հանդես գալ որպես միջնորդ, գրել է «CNN»-ը։

Ալիքի տեղեկություններով՝ հանդիպումը կկայանա փետրվարի 18-ին, իսկ Սաուդյան Արաբիայի պատվիրակությունը կգլխավորի թագավորության ազգային անվտանգության հարցերով խորհրդականը։

Միացյալ Նահանգները կներկայացնեն պետքարտուղար Մարկո Ռուբիոն, նախագահ Դոնալդ Թրամփի ազգային անվտանգության հարցերով խորհրդական Մայք Վալցը և Մերձավոր Արևելքի հարցերով հատուկ բանագնաց Սթիվեն Վիտկոֆֆը։ Ուկրաինացի մի պաշտոնյա, որի անունը չի նշվում, CNN-ին ասել է, որ Կիևը ներկայացված չի լինի բանակցություններին:

Հեռուստաընկերությունը նշել է, որ Սաուդյան Արաբիային կարեւոր դեր է հատկացվում Թրամփի վարչակազմի արտաքին քաղաքականության մեջ։

CNN-ը նշել է, որ թագաժառանգ արքայազն Մուհամեդ բեն Սալման Ալ Սաուդը, մասնավորապես, նպաստել է ամերիկացի Մարկ Ֆոգելի ազատ արձակմանը, ով Ռուսաստանում պատիժ էր կրում թմրանյութերի մաքսանենգության համար։

Լրատվամիջոցը հիշեցրել է, որ 2017 թվականին Թրամփը՝ որպես նախագահ, իր առաջին արտասահմանյան այցը կատարել է Սաուդյան Արաբիա։