Հինգշաբթի օրը ԱՄՆ ռազմավարական հրամանատարության ղեկավար, ծովակալ Չարլզ Ռիչարդն ասել է, որ Միացյալ Նահանգները «բռնությամբ» վերաշարադրում է միջուկային զենքի իր դոկտրինը`ակնարկելով, որ ամերիկացիները պատրաստ չեն այն ամենին, ինչ կարող է լինել հետո։ Նա նշել է, որ գալիս է մեծ ուժային հակամարտություն:
Նա նշել է, որ իրավիճակը աննախադեպ է երկրի պատմության մեջ, քանի որ ԱՄՆ-ը երբեք միաժամանակ միջուկային հնարավորություններ ունեցող երկու հավասար հակառակորդների չի հանդիպել, որոնց պետք է զսպել տարբեր մեթոդներով։
Մինչ այժմ Ամերիկան կիրառել է սառը պատերազմից մնացած համընդհանուր զսպման ռազմավարություն: Այդ ժամանակահատվածում թե՛ Միացյալ Նահանգները, թե՛ Խորհրդային Միությունը պահպանել են միմյանց բազմիցս ոչնչացնելու ունակությունը։
Ամերիկացի պաշտոնյաներն անհանգստանում են, որ Ռուսաստանը սահմանափակ թվով ավելի փոքր մարտագլխիկներ է օգտագործում հստակ թիրախների դեմ` համաշխարհային ջերմամիջուկային պատերազմի փոխարեն, որից վախենում էին տասնամյակներ շարունակ:
Մտահոգության լուրջ հիմքեր կան, քանի որ, ի թիվս այլ պատճառների, ԱՄՆ-ը չունի ոչ ռազմավարական զենքի ճիշտ տեսակ։ Կան միջուկային գրավիտացիոն ռումբեր, սակայն Ռուսաստանը գիտի, որ դրանք հատկապես խոցելի են, երբ պահվում են գետնին կամ վիճելի օդային տարածքով թռչող ինքնաթիռներում: Բացի այդ, հարվածելու հրամանի արձակման եւ թիրախի վրայով օդանավի անցնելու միջեւ գրեթե միշտ երկար ժամանակ է լինում։
Ավելին, ԱՄՆ ռազմածովային նավատորմին անհրաժեշտ է նոր սերնդի միջուկային հարվածով կարճ եւ միջին հեռահարության թեւավոր հրթիռներ, հիմնականում այն պատճառով, որ տարբեր նախագահներ, ներառյալ ներկայիս նախագահ Ջո Բայդենը, արգելափակել են դրանց զարգացումը: Կոնգրեսը փորձում է շտկել իրավիճակը, սակայն վիճակը դեռեւս աննախանձելի է՝ ունենալով սխալ տեսակի զենքեր, որոնք անհրաժեշտ են Ռուսաստանի կողմից ցածր արտադրողականության մարտագլխիկների օգտագործումը կանխելու համար: Պուտինը հավանաբար կարծում է, որ ԱՄՆ-ը չի սկսի համապարփակ ջերմամիջուկային պատերազմ՝ մարտավարական հարվածի պատճառով։
Քիսինջերը եւ այլ վերլուծաբաններ առաջ են քաշել զսպման սրամիտ տեսություններ, սակայն կարեւոր է միայն մեկ գործոն՝ հակառակորդի կարծիքը: Կարելի է վստահորեն ասել, որ զսպումը հիմա ձախողվում է, քանի որ ԱՄՆ-ի հակառակորդները կարծում են, որ երկրի ոչ մի նախագահ երբեք չի խոստանա մեգատոնի չափի զենք գործարկել՝ թույլ հարվածները կանխելու համար: