Հայաստանի կառավարությունը կարծում է՝ Ղարաբաղի կարգավիճակի հարցը անորոշ ժամանակով հետաձգելը ճիշտ է։ Հաջորդ տարվա բյուջեի նախագծի քննարկման համար երեկ խորհրդարան եկած վարչապետ Փաշինյանը հայտարարել է՝ առաջարկը ռուսական կողմից է հնչել, հիմնավորումն էլ, որ այս պահին օբյեկտիվորեն չկա հնարավորություն գտնել կողմերի համար ընդունելի կարգավիճակ, ուստի իրենք պաշտպանում են տեսակետը։
Փաշինյան-Ալիև-Պուտին՝ Սոչիի հանդիպումից հետո Հայաստանում Ռուսաստանի դեսպանը հայտարարել է՝ Մոսկվայի կարծիքով՝ Լեռնային Ղարաբաղի կարգավիճակի հարցն արժե թողնել հաջորդ սերունդներին։ Փաշինյանն երեկ ասել է՝ իր ղեկավարած կառավարության քաղաքականությունը 100 տոկոսով համապատասխանում է ռուսական տեսլականին։
Հայաստանի փաստացի վարչապետի նման դիրքորոշումը կարելի է համարել շրջադարձային, որովհետև անցած երկու ամիսներին Հայաստանի իշխանության տարբեր ներկայացուցիչներ ոչ միայն բաց տեքստով խոսում էին հայ- ադրբեջանական հարաբերությունների կարգավորման արևմտյան տարբերակի առավելությունների մասին, այլ նաև պաշտոնական Երևանը՝ հրապարակային խոսույթի մակարդակում բացահայտ քաղաքականություն էր վարում Ռուսաստանի դեմ, որի գագաթնակետը դարձան Փաշինյանի ընտանիքին պատկանող կայքում պաշտոնական Մոսկվային հասցեագրված քննադատությունն ու ՌԴ Պետդումայի պատգամավոր Կոնստանտին Զատուլինի մուտքի արգելքը Հայաստան:
Եվ ուրեմն՝ ինչո՞ւ տեղի ունեցավ Փաշինյանի ռուսական շրջադարձը:
Արդյո՞ք Փաշինյանն իրապես գիտակցում է, որ հայ- ադրբեջանական հարաբերությունների կարգավորման ռուսական տարբերակը նվազ ռիսկային է, թե՞ պատասխանատվությունը Մոսկվայի վրա բարդելու մարտավարություն է որդեգրել: Իսկ գուցե Փաշինյանին առաջնորդում են ներքաղաքական հաշվարկները ու նա պարզապես ցանկանում է նոյեմբերի 5-ի հանրահավաքից առաջ խորհրդարանական ընդդիմության օրակարգը զրկել մոտիվացիայից:
Մոտակա օրերին, թերևս, կստանանք այս հարցերի պատասխանները: