Գերմանիայի կանցլեր Օլաֆ Շոլցը գազի գները զսպելու համար եվրոպական միջամտության կոչ է արել, գրում է Politico-ն։
ԵՄ երկրները ներկայումս փորձում են ուղիներ գտնել՝ գազի աճող գները զսպելու համար, որոնք քաղաքական եւ տնտեսական քաոս են առաջացնում մայրցամաքում: Ուրբաթ օրը Էներգետիկայի նախարարները կհանդիպեն Բրյուսելում՝ գները մեղմելու Եվրահանձնաժողովի մի շարք առաջարկներ քննարկելու համար:
Թեեւ Գերմանիայի կառավարությունը հայտարարել է, որ թերահավատորեն է վերաբերվում ռուսական գազի ներկրման համար գնային սահմանաչափ մտցնելու առաջարկին, Շոլցն ասել է, թե կարծում է, որ ԵՄ միջամտությունը կարեւոր է էներգակիրների գների ճգնաժամը լուծելու համար:
Գերմանիան եւ ԵՄ այլ երկրներ ներկայումս բնական գազի համար վճարում են այնպիսի գներ, որոնք զգալիորեն գերազանցում են ծովով հեղուկացված բնական գազի (LNG) ներմուծման իրական արժեքը, ընդգծել է Շոլցը։
Նա խնդիրը բացատրել է այն փաստով, որ եվրոպական շատ երկրներ, որոնք ավելի էժան երկարաժամկետ պայմանագրերով կտրվել են ռուսական գազից, ստիպված են եղել լրացնել բացը` վերջին պահին համաշխարհային շուկայում կարճաժամկետ գնումներ կատարելով: Այս գնումների գները սովորականից շատ ավելի բարձր են՝ մասամբ Ռուսաստանից գազը կորցնելու ցնցման պատճառով։
Գերմանիայի էկոնոմիկայի նախարարության խոսնակը հայտարարել է, որ ԵՄ-ն կարող է փորձել իջեցնել գները՝ միավորելով իր սակարկությունների ուժը գազի համատեղ գնումների միջոցով, փոխարենը, որ ԵՄ յուրաքանչյուր երկիր եւ նրա էներգակիրներն անհատապես հայտ ներկայացնեն պայմանագրերի համար եւ մրցեն միմյանց հետ:
Եվրահանձնաժողովն արդեն ստեղծել է կամավոր հարթակ ապրիլին գազի համատեղ գնումների համար, սակայն օգոստոսի սկզբի դրությամբ գնումներ չեն կատարվել։ Գերմանիան նախկինում թերահավատորեն էր վերաբերվում այդ գաղափարին:
Ուրբաթ օրը Էներգետիկայի խորհրդում քննարկվելիք առաջարկությունների շրջանակում Հանձնաժողովը նաեւ առաջարկել է գազի նոր բազային գին, որն արտացոլում է ՀԲԳ-ի արժեքը համաշխարհային շուկայում: Դա կօգնի խուսափել Ռուսաստանից մատակարարումների ընդհատումներով պայմանավորված գների աճից:
Եվրահանձնաժողովի բարձրաստիճան պաշտոնյան ենթադրել է, որ ԵՄ-ի պաշտոնական առաջարկը կարվի միայն սեպտեմբերի 14-ին Եվրահանձնաժողովի նախագահ Ուրսուլա ֆոն դեր Լյայենի ելույթից հետո: