Հունգարիան պահանջում է Ռուսաստանի երեք քաղաքացիների հանել ԵՄ պատժամիջոցների ցուցակից, գրում է Politico-ն՝ հղում անելով աղբյուրներին։
Սեպտեմբերի 15-ը ՌԴ մի շարք քաղաքացիների նկատմամբ ԵՄ-ի կողմից սահմանված պատժամիջոցների երկարաձգման վերջնաժամկետն է։ Դաշինքի ներսում երկարաձգումը դիտվում էր որպես տեխնիկական խնդիր, ինչպես դա եղավ 2014 թվականից ի վեր Ռուսաստանի դեմ Ուկրաինայի վերաբերյալ նախկին պատժամիջոցների դեպքում։
Բուդապեշտը խնդրել է Ռուսաստանի երեք քաղաքացու հանել ԵՄ պատժամիջոցների ցուցակից, ասել են ԵՄ չորս դիվանագետներ եւ պաշտոնյաներ։ Այս քայլը վրդովեցրել է ԵՄ մյուս երկրներին:
Երկու դիվանագետների խոսքով՝ նրանք ռուս գործարարներ Ալիշեր Ուսմանովը, Պետր Ավենը եւ Վիկտոր Ռաշնիկովն են։
Ուսմանովն իր հարստությունը վաստակել է հանքարդյունաբերության եւ ներդրումների ոլորտում եւ հանդիսանում է «Արսենալ» ֆուտբոլային ակումբի նախկին բաժնետեր:
Հունգարիայի կառավարության խոսնակ Զոլթան Կովաչը հայտարարել է, որ ԵՄ-ն համատեղ որոշում կկայացնի պատժամիջոցների ցուցակի վերաբերյալ։ «ԵՄ պատժամիջոցների ցուցակները մշտապես վերանայվում են, եւ կան մտավախություններ, որ պատժամիջոցների ցուցակում որոշակի անձանց կամ կազմակերպությունների ընդգրկումը բավարար չափով արդարացված չէ», - գրել է նա Twitter-ում: