Խռմփոցից ազատվելու պատճառներն ու մեթոդներր վաղուց էր որոնվում։ Սակայն վերջերս գիտնականները կարծես պարզ ու արդյունավետ միջոց են գտել։ Մասնավորապես, ինչպես գրում է Mirror-ը, սովորական ջուրը կօգնի հաղթահարել թեթեւ խռմփոցը։
Խռմփոցը թեթևացնելու համար նրանք առաջարկում են ավելի շատ մաքուր ջուր խմել և օրգանիզմը բավարար մակարդակի վրա պահել: Պարզապես ոչ թե սուրճ կամ քաղցր ըմպելիքներ, այլ ջուր:
«Ֆիզիոլոգիական առումով խռմփոցն առաջանում է, երբ մենք հանգստանում ենք քնի ժամանակ, և շնչուղիների որոշ հատվածներ նեղանում են՝ առաջացնելով բերանի, քթի, կոկորդի կամ լեզվի թրթռումներ: Բավարար խոնավության պահպանումը կարող է նշանակել, որ այս հատվածներում ավելի քիչ լորձ կձևավորվի, որն իր հերթին կթեթևացնի խռմփոցի ախտանիշները»,- բացատրում են մասնագետները:
Նրանք նաև հիշեցրել են, որ ալկոհոլն ու ծխելը, ընդհակառակը, խորացնում են խռմփոցի խնդիրը։
«Միջին մարդուն օրական 6-ից 8 բաժակ հեղուկ է անհրաժեշտ, թեև դա կարող է աճել, եթե եղանակը շոգ է, վատ ինքնազգացողություն ունեք կամ մարզվում եք»,- ասել է աղբյուրը։
Այնուամենայնիվ, հետազոտողները զգուշացնում են, որ խռմփոցի խնդիրը լուծելու համար չպետք է ամբողջությամբ ապավինել խմելու ջրին։ Եթե զգում եք, որ խնդիրն իսկապես անհանգստացնում է ձեզ, անպայման դիմեք բժշկի օգնությանը։