Ուսումնասիրելով պատգամավորների հայտարարագրերը պարզում ենք, որ «Հայաստան» խմբակցության պատգամավոր Արգիշտի Նորայրի Գևորգյանի գույքի և եկամուտների հայտարարագիրը ներկայացված չէ: 

Վերջինս պատգամավորի մանդատ է ստացել 2022 հուլիսի 18-ին: Պաշտոնը ստանձնելուց անցել է ավելի քան երեք ամիս, բայց հայտարարագրերի ռեեստրում պատգամավորի հայտարարագիրը չկա: «Հանրային ծառայության մասին» օրենքի հոդված 33-ում նշված է, որ հայտարարատու պաշտոնատար անձինք պաշտոնեական պարտականությունները ստանձնելու կամ դադարեցնելու օրվա դրությամբ հայտարարագրերը ներկայացնում են այդ օրերին հաջորդող 30 օրվա ընթացքում: Նույն օրենքի հոդված 37-ում նշված է, որ Հանձնաժողովը հայտարարագիրը ռեեստրում զետեղելուց հետո՝ 7 օրվա ընթացքում, ապահովում է դրա հրապարակումն իր պաշտոնական կայքէջում: 

Արգիշտի Գևորգյանը MediaHub-ի հետ զրույցում նշեց, որ ինքը Կոռուպցիայի կանխարգելման հանձնաժողով ներկայացրել է գույքի և եկամուտների հայտարարագիրը, սակայն տեղյակ չէ՝ այն հրապարակվել է, թե ոչ: 

Փաստացի թերացողն այս դեպքում ոչ թե պատգամավորն է, այլ պետական մարմինը: Արդյունքում cpcarmenia.am կայքի հայտարարագրերի ռեեստր բաժնում դեռևս հրապարակված չէ պատգամավորի գույքի և եկամուտների հայտարարագիրը, կան միայն փոխկապակցված անձանց անունները:

Շուշանիկ Միսկարյան