Նիկոլ Փաշինյանի տիկինը՝ Աննա Հակոբյանը Հայաստանի պատմության վերջին երեսուն տարիներին ամենից ակտիվ առաջին տիկինն է: Դրանում համոզվելու համար բավարար է հետևել նրա սոցիալական ցանցերին՝ մեկ Շվեյցարիա, մեկ շքեղագույն Մոնակո, մեկ Լազուրե ափ, կամ էլ տեղեկացնում է, որ ուշացել է օդանավից: Եվ սա այն դեպքում, երբ առաջին տիկին լինելը պաշտոն չէ և նման այցերը պրոտոկոլային պարտավորություն չեն:
Աննա Հակոբյանի դեպքում՝ դա հաճոիւյք է: Ինքը մեկնում է արտերկիր ու պարտադիր տեղյակ պահում այդ մասին, թեև մոնետիզացիայի առումով այդ այցերը ինչ են տալիս ՀՀ-ին՝ պարզ չէ: Ավելի շուտ՝ պարզ է, բայց ո՞ւմ է այդ հարցը հուզում:
Եվ ահա սոցցանցից տեղեկանում ենք, որ հերթական այցը կայացել է Փարիզ և Հակոբյանին ընդունել է Ֆրանսիայի նախագահի տիկինը՝ Բրիջիթ Մակրոնը:
«Տիկին Մակրոնին ներկայացրեցի, թե որքան է փոխվել Երևանը 2018 թվականի հոկտեմբերից հետո, երբ տեր և տիկին Մակրոնները վայելեցին մեր քաղաքի տաք հյուրընկալությունը։ Ասացի, որ միայն պատկերացնել կարելի է, թե այս չորս տարվա ընթացքում դեռ որքան կզարգանար Հայաստանը, եթե չլիներ 2020 թվականի դավադիր պատերազմը։ Այդ դեպքում Եվրոպան մեր տարածաշրջանում արդեն իսկ կունենար հզոր, ժողովրդավար, ազատ և ուժեղ գործընկեր՝ ի դեմս Հայաստանի։ Բայց սա մի դժվար ճանապարհ է, որ Հայաստանը և հայ ժողովուրդը հաստատատակամ է անցնել, և մենք շնորհակալ ենք բոլոր բարեկամ երկրներին, ովքեր մեր կողքին կլինեն այդ ընթացքում»,- գրել է Հակոբյանը՝ լուսանկարներ հրապարակելով։
Փաստացի, որդեկորույս մայրերին հաթաթա տալուց զատ Փաշինյանի կինը միայն ու միայն եվրոպական երկրներով շրջագայություններով է զբաղված: Նա, հիշեցնենք, չի գնում ու նաև այս տարի էլ չգնաց Եռաբլուր սեպտեմբերի 27-ին, երբ իր ամուսինը՝ Փաշինյանը, Հայաստանում չէր: Բայց կարո՞ղ էր, չէ՞, գնալ՝ ցավակցել մայրերին: Բայց Աննա Հակոբյանը չի ցավակցում մայրերին, որոնք այս օրերին իրենց որդիների մահվան երկրորդ տարելիցն են սգում: Փոխարենը մեղադրում մայրերին, թե նրանք միայն լացում, սգում ու աղոթում են....
Մնում է միայն հույս հայտնել, որ նման ակտիվություն ցուցաբերող ՀՀ առաջին տիկին Հայաստանը ինչպես չէր ունեցել, այնպես էլ հետագայում չի ունենա: