Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հոկտեմբերի վերջին հնարավոր է Ռուսաստանում եռակողմ բանակցություններ անցկացնեն՝ Վլադիմիր Պուտինի մասնակցությամբ։ Ռուսական «Վեդոմոստի»-ին տեղեկությունը հայտնել է դիվանագիտական աղբյուրը։

Ըստ պարբերականի՝ հանդիպումը սկսել է նախապատրաստվել ԱՊՀ գագաթնաժողովում Ռուսաստանի նախագահի ելույթից հետո: Պուտինը մոտ երկու շաբաթ առաջ Հայաստանի ու Ադրբեջանի առաջնորդներին առաջարկել էր հանդիպել իրենց հարմար ժամանակ՝ ցանկացած քաղաքում՝ Սոչիում, Մոսկվայում, Սանկտ Պետերբուրգում։

Երեկ նաև Կրեմլի խոսնակն է անդրադարձել Հայաստանի ու Ադրբեջանի ղեկավարների հետ հանդիպելու` նախագահ Պուտինի նախաձեռնությանը: 

«Նման գագաթնաժողով նախապատրաստվում է, դրա անցկացման վայրի և ժամկետի մասին Կրեմլը հավելյալ տեղեկություններ կհաղորդի», - ասել է Դմիտրի Պեսկովը: 

Պաշտոնական Երևանն ու Բաքուն դեռևս չեն հաստատել եռակողմ հանդիպման փաստը, բայց նաև չեն հերքել նման հնարավորությունը:

Արդյո՞ք Մոսկվան փորձում է բանակցային գործընթացում վերականգնել իր դիրքերը, թե՞ սա ընդամենը հակազդեցության փորձ է Արևմուտքի վերջին շրջանի ակտիվությանը, արդյո՞ք ինչ-որ կերպ համադրվելու են Բրյուսելի ու Մոսկվայի միջնորդական հարթակները, թե՞ նրանց հարաբերությունները զարգանալու են հակադրության ոգով:

Սրանք հարցեր են, որոնք գոնե այս պահին չունեն միանշանակ պատասխաններ:

Մյուս կողմից, կան նշաններ, որոնք հուշում են, որ Ռուսաստանի և Արևմուտքի հակադրությունը մեր տարածաշրջանում ուժեղանալու է:

«Մեզ չեն կարող չանհանգստացնել Հարավային Կովկասում թափ հավաքող մտահոգիչ միտումները, ուր Արևմուտքը փորձում է տեղափոխել Ուկրաինայի վրա փորձարկված առճակատման մեխանիզմները», - ասել է ՌԴ արտգործնախարարության խոսնակը: Մարիա Զախարովան ծավալուն անդրադարձել է հատկապես Հայաստանի շուրջ զարգացումներին, պնդելով, թե հայ-ռուսական «դարավոր կապերին վնասելու համար տարածաշրջանում Ռուսաստանի քաղաքականությունը վարկաբեկող քայլեր են ձեռնարկվում», սակայն իրենք վստահ են, որ «Երևանին և Մոսկվային գժտեցնելու այդ փորձերը հաջողությամբ չեն պսակվելու»:

Մեր տարածաշրջանում Արևմուտքի ակտիվացման ակնհայտ փորձերը ու դրանց ՌԴ ԱԳՆ երեկվա կոշտ արձագանքը հուշում են, որ Հարավային Կովկասը դառնում է գլոբալ հակադրության նոր թատերաբեմ: Դրանից Հայաստանի անվտանգային ռիսկերը միայն ավելանալու են:

Վահրամ Բագրատյան