Ուկրաինայում տիրող իրադրության վերաբերյալ ՄԱԿ-ի կենտրոնակայանում հնչեցված հակառուսական հայտարարությանը միացել է կազմակերպության անդամ պետությունների մոտ 1/3-ը. այդ մասին հայտնում է RIA Novosti-ն:
ՄԱԿ-ի կազմի մեջ մտնում է 193 երկիր: Հայտարարության տակ ստորագրել է 54 պետություն: Դրանց թվում են ԱՄՆ-ը, Մեծ Բրիտանիան, Ալբանիան, Ավստրալիան, Կանադան, Չեխիան, Վրաստանը, Ֆրանսիան, Ճապոնիան, Լատվիան, Լիտվան, Իտալիան, Իսպանիան և Ուկրաինան: Հայտարարությունն ընթերցել է ՄԱԿ-ում Ուկրաինայի մշտական ներկայացուցիչ Սերգեյ Կիսլիցան:
Այս պետություններն իրենց ափսոսանքն են հայտնել, որ Ռուսաստանը չի դադարեցրել հատուկ ռազմական գործողությունը։ Նրանք դատապարտել են հրթիռային հարվածները, որոնք Ռուսաստանը հասցնում է Ուկրաինայի տարածքին:
«Մենք հավատարիմ ենք մնում Ուկրաինայի ինքնիշխանությանը, անկախությանը, միասնությանը և տարածքային ամբողջականությանը նրա միջազգայնորեն ճանաչված սահմաններում», - ասվում է հայտարարության մեջ։
Հայտարարության հեղինակները կոչ են արել Ռուսաստանին անհապաղ դադարեցնել ռազմական գործողությունները։
Հիշեցնենք, որ Ռուսաստանն Ուկրաինայում ռազմական գործողությունը սկսել է փետրվարի 24-ին: