Ընդդիմադիր «Հայաստան» և «Պատիվ ունեմ» դաշինքները գրեթե վեցամսյա ընդմիջումից հետո կրկին վերադարձել են խորհրդարան։ «Հայաստան» խմբակցության ղեկավար Սեյրան Օհանյանը լրագրողների հետ զրույցում ասել է, թե այս որոշումը պայմանավորված է «ժողովուրդի պահանջով»։
«Ժողովուրդը մեզնից պահանջում է ԱԺ-ով ու մեր օրակարգով հեռացնել Փաշինյանին», - ասել է նա։
Օհանյանը նաև ընդունել է, որ ընդդիմությունը չի կարողացել փողոցում գեներացնել այնքան ուժ, որը կստիպեր գործող վարչապետին հեռանալ։
Խորհրդարանական ընդդիմությունը վերադարձել է խորհրդարան: Ծաղրել պետք չէ, երկիրը բախվել է այնպիսի արտաքին մարտահրավերների, որ իշխանություն- ընդդիմություն քաղաքական համակեցությունը, ԱԺ քաղաքական լեգիտիմության ուժեղացումն անհրաժեշտություն են:
Թվում էր՝ հենց այս իմպերատիվը պետք է գերիշխող լիներ, սակայն իշխանության ու ընդդիմության կողմից երկուստեք հնչեցին հայտարարություններ, որոնք, մեղմ ասած, հիասթափեցնող են:
Օրինակ, ընդդիմությունն այդպես էլ չի մանրամասնում՝ ԱԺ-ում ինչպե՞ս է հասնելու Փաշինյանի հեռացմանը, երբ փողոցում կատարելապես ձախողել է այդ օրակարգն ու այս պահին չկա որևէ նշան, որը կվկայեր խորհրդարանական մեծամասնության շարքերում նկատվող ճաքերի, պառակտումների մասին: Մյուս կողմից, տպավորություն է, որ մեր իշխանությանը, մեղմ ասած, դուր է գալիս Հյուսիսային Կորեայի տեսլականը, առանց ընդդիմության խորհրդարան ունենալու պատկերը, հակառակ պարագայում՝ երեկ այդքան ծաղրական ու հեգնական վերաբերմունք չէր լինի խորհրդարան վերադարձած ընդդիմության հանդեպ՝ նրա երեք պատգամավորներին կալանավորելու սպառնալիք- ուրվականով:
Խորհրդարանական ինստիտուտն արագ գահավիժում է՝ տոտալ հեղինակազրկման փաստի առաջ կանգնեցնելով թե՛ ՔՊ-ին և թե՛ ընդդիմությանը:
Վահրամ Բագրատյան