Փաշինյանի երեկվա ասածից այն հասկացվեց, որ ստորագրված փաստաթուղթ կա և այդ փաստաթուղթը ներկայացրեց ավելի շատ պրոադրբեջանական տեսանկյունից։ Հետաքրքիրն այն է, որ ադրբեջանական թեզերը Փաշինյանի բերանից են արտասանվում և համոզմունք ունեմ, որ մինչև ասուլիսի սկսվելը վարչապետը ուսումնասիրում է, թե Ադրբեջանում ինչ են ասում, որ ինքն էլ դա իր հերթին հասարակության «վզին փաթաթի»։ Այս մասին այսօր MediaHub.am-ի հետ զրույցում ասաց ադրբեջանագետ Գառնիկ Դավթյանը՝ խոսելով Նիկոլ Փաշինյանի երեկվա այն հայտարարության մասին, թե երթուղու փոփոխություն տեղի ունենալու պարագայում այն տարածքները, որոնք չեն գտնվում նախկին ԼՂԻՄ-ի կազմում, անցնելու են Ադրբեջանի վերահսկողության տակ։
Նշենք, որ Փաշինյանը սա հայտարարել էր՝ պատասխանելով Բերձորը շրջանցող նոր ճանապարհի շահագործման դեպքում Բերձոր, Աղավնո և Սուս գյուղերի՝ Ադրբեջանին անցնելու մասին հարցին։
Գառնիկ Դավթյանի խոսքով՝ հատկանշական է, որ Փաշինյանը փոխզիջումների հետ կապված որոշումները չի քննարկում թիմակիցների և համակիրների հետ։ «Ինչ վերաբերում է Բերձորի և Աղավնոյի հանձնմանը՝ ես խիստ կասկածում եմ, որ դրանք հայկական կմնան։ Նոր երթուղին լիովին կտրում է Լաչինի միջանցքը, որովհետև, եթե օրինակ, Աղավնոն սահմանակից է ՀՀ-ին, ապա այս նոր ճանապարհը ավելի հարավարևելյան հատվածով է գնում և ընդհանրապես կապ չունի ո՛չ Աղավնոյի ո՛չ Բերձորի հետ, լրիվ այլ ճանապարհ է։ Բացի սա, նոր ճանապարհն ավելի լայն է կառուցվում, որը, ըստ էության, արվում է նրա համար, որ Ադրբեջանը կարողանա հետագայում բեռներ տեղափոխել մինչև Նախիջևան»,-ասաց նա։
Ադրբեջանագետի խոսքով՝ նոր ճանապարհը նաև ռելիեֆային առումով ավելի բարդ ուղղություններով է անցնում՝ ավելի բաց տարածքով։ «Ավելի թեք է անցնելու, հետևաբար, եթե հումանիտար, ռազմական աջակցության կարիք լինի, դժվարությունների առաջ ենք մենք կագնելու։ Բանակցային գործընթացի մանիպուլատիվ հայտարարությունները ոչ մի տրամաբանական հենք չունեն և նոյեմբերի 9-ի փաստաթղթի 6-րդ կետի մասով կոնկրետ բացատրություն չկա»։
Վարչապետի այն խոսքը, թե Բաքուն ցանկանում է նոր պատերազմի լեգիտիմություն ստեղծել՝ հրաժարվելով խոսակցությունից՝ ադրբեջանագետը մեկնաբանեց որպես աթոռից զրկվելու վախ և այս ուղերձները միայն ներքաղաքական բնույթ են կրում։
Լիաննա Թովմասյան