Աֆղանստանի արեւելքում սեզոնային անձրեւներից առաջացած սաստիկ ջրհեղեղի հետեւանքով զոհվել է առնվազն ինը մարդ. ջրհեղեղը քշել է տները, ոչնչացրել անասուններն ու հողատարածքները, հայտնում է AP լրատվական գործակալությունը՝ հղում տալով տեղական իշխանություններին:
Լոգարի նահանգի աղետների կառավարման նախարարության ղեկավար Աբդուլլահ Մուֆաքերը ասել է, որ դեռեւս հայտնի չէ, թե քանի մարդ է զոհվել ու վիրավորվել ջրի մակարդակի բարձրացման հետեւանքով, սակայն առնվազն ինը մարդ մահացել է:
Գյուղի ավագ Դել Աղան ասել է, որ ջրհեղեղն աննախադեպ է եղել Խուշիի պատմության մեջ:
«Դա ոչնչացրել է բոլոր կենդանիներին, տներն ու գյուղատնտեսական հողերը: Մարդիկ մնացել են անօթեւան եւ ապաստանել են սարերում», - ասել է նա:
Անցյալ շաբաթ հորդառատ անձրեւները առաջացրել են հեղեղումներ, որոնց հետեւանքով զոհվել է առնվազն 31 մարդ, իսկ երկրի հյուսիսում տասնյակ մարդիկ անհետ կորել են: