Եվրամիություն մուտքի վիզաները նախկինի պես կտրվեն Ռուսաստանի որոշ կատեգորիաների քաղաքացիների։ Այս մասին հայտարարել է ԵՄ դիվանագիտության ղեկավար Ժոզեպ Բորելը։
«Վիզաների տրամադրումը կշարունակվի անհատական հիմունքներով՝ յուրաքանչյուր կոնկրետ դեպքի եւ, մասնավորապես, մարդկանց որոշակի խմբերի համար»,- բացատրել է Բորելը, ընդգծելով, որ ԵՄ-ն «չի ցանկանում իրեն պատնեշել այն ռուսաստանցիներից, որոնք դեմ են Ուկրաինայի պատերազմին», Ռուսաստանի քաղաքացիական հասարակությունից։
Օգոստոսի 31-ին ԵՄ 27 երկրների ԱԳ նախարարները որոշել են ամբողջությամբ սառեցնել Ռուսաստանի հետ վիզային ռեժիմի դյուրացման համաձայնագիրը, ինչը նշանակում է տրվող վիզաների քանակի նվազում եւ դրանց ստացման գործընթացի բարդացում։
Միեւնույն ժամանակ, արտգործնախարարներին չի հաջողվել համաձայնեցնել Ռուսաստանի քաղաքացիներին շենգենյան վիզաների տրամադրման ամբողջական արգելքը, քանի որ շատ երկրներ դեմ են արտահայտվել այդ արգելքին։