Ռուսաստանի հետ դյուրացված վիզային ռեժիմի գործունեությունը կասեցնելու Եվրամիության որոշումն անհետեւանք չի մնա, ի պատասխան Մոսկվան կարող է ձեռնարկել ինչպես սիմետրիկ, այնպես էլ ասիմետրիկ միջոցներ, որոնց չեն սպասում Բրյուսելում՝ եթե այնտեղ որոշել են հերթական անգամ «իրենց ոտքին կրակել», ապա դա նրանց ընտրությունն է, «ՌԻԱ Նովոստի»-ին ասել է ՌԴ ԱԳ փոխնախարար Ալեքսանդր Գրուշկոն։
Չորեքշաբթի օրը ԵՄ դիվանագետ Ժոզեպ Բորելը հայտարարել է, որ ԵՄ երկրները քաղաքական համաձայնություն են ձեռք բերել՝ Ռուսաստանի հետ վիզային ռեժիմի դյուրացումն ամբողջությամբ դադարեցնելու վերաբերյալ, սակայն Ռուսաստանի քաղաքացիների որոշ կատեգորիաներ դեռ կկարողանան ԵՄ վիզա ստանալ:
«Ռուսաստանի հետ վիզային ռեժիմի դյուրացման համաձայնագրի ԵՄ-ի խախտումը, շրջանցումը կամ դրանից դուրս գալը անհետեւանք չի մնա։ Մենք ինքներս կորոշենք՝ միջոցները կլինեն սիմետրիկ, ասիմետրիկ, թե այլ բան, որը ԵՄ-ն չի սպասում։ Եթե Բրյուսելում որոշել են հերթական անգամ կրակել իրենց ոտքին, դա նրանց ընտրությունն է»,- ասել է Գրուշկոն:
«Ռուսաստանի հետ օդային եւ այլ հաղորդակցությունները դադարեցնելով՝ ԵՄ քաղաքացիներին մեր երկիր այցելելու, մեզ մոտ աշխատելու հնարավորությունից զրկելու համար, ո՞ւմ են պատժում։ Վայրիություն եւ ամոթ է «լուսավորչական Եվրոպայի» համար։ Հետաքրքիր է՝ Սանկտ Պետերբուրգ-Հելսինկի երկաթգիծը ֆինները երկաթի ջարդոնի՞ են վերածելու: Արեւմուտքի երկրները կաշվից դուրս էին գալիս Հելսինկյան եզրափակիչ ակտում տեղաշարժի ազատության մասին դրույթ ներառելու համար: «Ավտորիտար ԽՍՀՄ»-ը համաձայնեց դրան։ Ինչպես նաեւ տեղեկատվության ազատությանը։ Հիմա ԵՄ-ն զբաղված է ցանկապատների կառուցմամբ»,- հավելել է բարձրաստիճան դիվանագետը։