Ադրբեջանում արտադրում են «Զանգեզուր» կոչվող անօդաչու թռչող սարք, զուգահեռ էլ խոսում խաղաղության մասին
Ադրբեջանի նախագահ Իլհամ Ալիևն առիթը բաց չի թողնում Հայաստանի դեմ հոխորտալու՝ նոր տարածքներ գրավելու, Ադրբեջանի ռազմական կարողությունների, տարածաշրջանում հարցեր լուծելու մասին։ Թիկունքում զգալով Թուրքիայի աջակցությունը, նա օկուպացված Արցախում խոսել է «Զանգեզուրի միջանցքի» մասին։
Ալիևներն այս անգամ օկուպացված Արցախի տարածք են այցելել Հաղթանակի զբոսայգու հիմնարկեքին մասնակցելու համար, որը կառուցվում է արդեն իսկ հիմնահատակ ավերված, հողին հավասարեցված Թումանյան թաղամասի տեղանքում։
«Կարևորագույն ուղերձները Իլհամ Ալիևը փոխանցում է օկուպացված Ստեփանակերտից։ Նա նշել է, որ իրենք չեն մոռացել և չեն մոռանա Զանգեզուրը, բայցև տարածքային պահանջ չունեն Հայաստանի նկատմամբ, ընդգծելով, որ Երևանը պետք է կատարի ստանձնած պարտավորությունները՝ ապահովելով Ադրբեջանից Ադրբեջան (Նախիջևան) անարգել անցումը՝ առանց որևէ ստուգումների և խոչընդոտների։ Սա նշանակում է, որ Ալիևը ևս առաջնորդվում է պոպուլիզմի գաղափարախոսությամբ։ Այսինքն, մի կողմից հայտարարում է, թե տարածքային պահանջներ չունի, մյուս կողմից խոսում է Ադրբեջանը՝ Նախիջևանին կապող անխոչնդոտ ճանապարհի մասին»,- MediaHub-ի հետ զրույցում ասում է իրավաբան Ինգա Բալայանը։
Նրա խոսքով՝ մեր տարածաշրջանում կայուն ու երկարատև խաղաղություն չի լինելու, քանի դեռ Ադրբեջանի ցանկությունները զսպողներ չկան, իսկ Հայաստանը ղեկավարվում է այնպիսի իշխանության կողմից, որը լեգիտիմացնում է Ադրբեջանի ցանկացած հակահայ քայլ։
«Ադրբեջանում հայերի հանդեպ ատելության քարոզն ու ՀՀ-ի նկատմամբ տարածքային հավակնություններն արտացոլված են ամենուրեք՝ դպրոցական դասագրքերից մինչև մշակույթի ու սպորտի ոլորտներ։ Խաղաղության ձգտող երկիրը պետական լրատվամիջոցներով չէր ներկայացնի իրենց նոր արտադրած «Զանգեզուր» կոչվող անօդաչու թռչող սարքը։ 44-օրյա պատերազմի ժամանակ ԱԹՍ-ները նրանք կոչում էին "Iti qovan", այսինքն՝ «շուն քշող»։ «Շուն» ասելով նրանք նկատի ունեն հայերին»,-հավելեց իրավաբանը։
Որքան էլ ադրբեջանական քարոզչամեքենան Սյունիքը ներկայացնի իբրև Արևմտյան Ադրբեջանի մաս, նշենք, որ «Զանգեզուր»-ը հայկական ծագման բառ է։ Տեղանունն արտացոլում է Ձագէձոր/Ձագաձոր անվան փոխակերպված ձևը։
Հունան Թադևոսյան
