Սեպտեմբերի 13-ի ագրեսիայի արդյունքում մեր հայրենակիցների գերեվարումից և հայրենադարձումից հետո էական տեղաշարժ չի եղել։ Այս պահին պաշտոնականացված գերիների թիվը 33-ն է, ընդորում, բոլորը 44-օրյա պատերազմի ընթացքում կամ դրանից հետո գերեվարվածներ են։ Այս մասին այսօր MediaHub.am-ի հետ զրույցում ասաց Մարդու իրավունքների եվրոպական դատարանում Ադրբեջանում գտնվող հայ ռազմագերիների շահերի ներկայացուցիչ, իրավապաշտպան Սիրանուշ Սահակյանը։
«Այս խմբաքանակի մեջ ներառված չեն ՀՀ տարածքից գերեվարվածները, որոնց Ադրբեջանի ԶՈՒ- ն գերեվարել է 2021 թվականի նոյեմբերին Իշխանասարից, ինչպես նաև 2022 թվականի սեպտեմբերի 13-ից հետո։ Իհարկե, ոչ պաշտոնականացված գերիների թիվն անհամեմատ մեծ է, 80 թիվը դեռ անփոփոխ է և այս ուղղությամբ էլ դրական տեղաշարժ չկա»,-ասաց նա և հավելեց, որ վերջին վերաձարձված գերիները սեպտեմբերի 13-ից հետո էին գերեվարվել։
Դիտարկմանը, թե այս ուղղությամբ ակտիվություն է ցուցաբերում նաև Նիկոլ Փաշինյանը և տարբեր հարթակներից հայտնում, որ Ադրբեջանը չի կատարում իր պարտավորությունները գերիների վերադարձի հետ կապված, իրավապաշտպանն ընդգծեց, որ վերջին շրջանում գերիների վերադարձի հարցում ավելի ակտիվ սկսել են գործել նաև Արևմտյան երկրները՝ ԵՄ-ն, ԱՄՆ-ն, այդ պատճառով էլ հայկական կողմը միջազգայնեցնում է պարտավորությունների խախտումը։
«Հայկական կողմը դիմում է միջազգային կառույցներին, որպեսզի ինտենսիվացնեն ճնշումն այս մարդասիրական խնդիրը լուծելու համար։ Այս պահին կտրուկ շարժեր չկան, դիվանագիտական մակարդակում փաստեր են ներկայացվում տարբեր կառույցների՝ և՛ կառավարական, և՛ ոչ կառավարական։ Իրավական գործընթացներ են, բայց դատավարության վճռորոշ փուլեր դեռ չեն թևակոխել, և այստեղ հավելյալ ժամանակ կպահանջվի»,- հավելեց Սահակյանը։
Լիաննա Թորոսյան