Երևանի քաղաքապետարանի տրանսպորտի վարչության պետի պաշտոնը զբաղեցնող Վազգեն Հարությունյանը, որը նախկինում «Փարքինգ սիթի սերվիս» («կարմիր գծերի») տնօրենն էր, գոհ է Երևանի քաղաքապետարանի ներկայացրած նախագծով առաջարկվող փոփոխությունից, որով «կարմիր գծերի» վճարը մեկ տարվա դիմաց 12 հազար դրամի փոխարեն կարող է դառնալ 160 հազար դրամ, եթե ընդունվի որոշումը, իհարկե։

«Կարծում ենք՝ այո, տվյալ թանկացումը կարող է հանդիսանալ խթան՝ հասարակական տրանսպորտի, ինչպես նաև Երևան քաղաքի երթևեկն ավելի լավ և արդյունավետ կազմակերպելու համար»,- Mediahub-ի հետ զրույցում ասաց Վազգեն Հարությունյանը։

Իսկ բոլոր այն քաղաքացիները, որոնք չեն կարողանա այդ գումարը վճարել, բայց ստիպված են կայանել կենտրոնում, քաղաքապետարանն այդ քաղաքացիներին այլընտրանք առաջարկո՞ւմ է, ասենք՝ անվճար կայանատեղիներ կենտրոնում։ 

«Ես կառաջարկեմ տվյալ քաղաքացիներին՝ օգտվել անվճար կայանատեղերից, որը կարգավորվում է օրենքով: Եվ Երևան քաղաքի կենտրոնում ոչ բոլոր փողոցներն են  կահավորված վճարովի կայանատեղերով, և կան բազմաթիվ անվճար կայանատեղեր։ Քաղաքացին, եթե չի ուզում վճարել, կա այլընտրանք՝ անվճարը։ Էնպես չի, որ երաշխավորված է, որ վճարովի կայանատեղերը բոլորը ազատ են և սպասում են վարորդներին։ Այո՛, այսօր խնդիրն այնքան է հասունացել, որ անգամ վճարովի կայանատեղերում չենք կարողանում ազատ տեղ գտնել մեքենան կայանելու համար»,- ասաց քաղաքապետարանի պաշտոնյան։

Մանրամասն՝ տեսանյութում

Վահե Մակարյան