Անգլիան կիսաեզրափակիչում է, շվեյցարացիները գնում են տուն․ բրիտանացիները 11 մետրանոց հարվածաշարով 5-3 հաշվով հաղթանակ տարան։
Չնայած Անգլիայի ակտիվությանը հանդիպման հաշիվը բացեց Շվեյցարիան։ 75-րդ րոպեին շվեյցարացիները եզրային գրոհ սկսեցին, և տուգանային հրապարակ արված փոխանցմանն առաջինը դիպավ Անգլիայի պաշտպան Ջոն Սթոնզը, ում ոտքից գնդակը հայտնվեց «Շալկե 04»-ի հարձակվող Բրել Էմբոլոյի մոտ, որն էլ շատ մոտ տարածությունից գրավեց դարպասը։
Բրիտանացիները, սակայն, երկար չսպասեցին։ 5 րոպե անց՝ 80-րդ րոպեին, «Արսենալի» հարձակվող Բուկայո Սական հեռվից կատարած բիլիարդային հարվածով հավասարեցրեց հաշիվը։ Գոլային փոխանցման հեղինակ դարձավ նրա ակումբային թիմակից Դեկլան Ռայսը։
Իսկ արդեն հիմնական ու լրացուցիչ ժամանակում թիմերը փոխանակվեցին միայն վտանգավոր պահերով։ Եվ արդեն 11 մետրանոցներով Անգլիան 5-3 հաղթեց և անցավ 1/2 եզրափակիչ։
Առաջինը դարպասը գրավեց «Չելսիի» հարձակվող Քոուլ Փալմերը։ Իսկ արդեն «Մանչեսթեր Սիթիի» պաշտպան Մանուել Ականջին վրիպեց, ինչ էլ ճակատագրական եղավ։
Հարձակվող Բուկայո Սական ճանաչվեց Շվեյցարիայի դեմ հաղթական հանդիպման խաղացող։
Կիսաեզրափակիչում Անգլիան կխաղա Նիդեռլանդներ - Թուրքիա զույգի հաղթողի դեմ։