Լոռու մարզի մի շարք բնակավայրեր հայտնվել են բլոկադայի մեջ ՝ առանց ելքի և մուտքի: MediaHub-ի հետ զրույցում «Համախմբման և աջակցության կենտրոն» ՀԿ նախագահ Օլեգ Դուլգարյանը նշեց, որ երեկվանից իրավիճակը չի փոխվել, ամեն ինչ նույնն է՝ Ախթալա, Շամլուղ քաղաքները, Փոքր Այրում, Մեծ Այրում, Ճոճկան, Շնող և Թեղուտ բնակավայրերը շարունակում են մնալ բլոկադայի մեջ։ Վառելիքի պաշարի սպառման հետևանքով կոմունիկացիան դժվարացել է նաև հարևան բնակավայրերի հետ։
«Այսօր տեղացիներից մեկը իր և իր հարևանների համար գնաց ալյուր գնեց Ախթալայից, բարեբախտաբար այնտեղ ալյուրի գործարան կա, և դա իր վերջին այցելությունն էր, որովհետև նա այլևս վառելիք չունի»,- ասաց նա։
Նա նշեց, որ մարդիկ հիմնականում մտածում են այլուր գնելու մասին, և այդ գործարանը ընդհանրապես չի թանկացրել, վաճառում է այն գնով, ինչպես նախկինում էր՝ առանց արհեստական թանկացումների։
«Բայց մենք պետք է հաշվի առնենք, որ կան սոցիալական տարբեր խմբերի մարդիկ, որոնք խոցելի են ֆինանսական առումով, օրինակ՝ նրանք հացը գնում են ամենօրյա ռեժիմով և ամսվա ավարտին վճարում»,- ասաց Դուլգարյանը՝ ավելացնելով, որ առաջնահերթ այդ մարդկանց համար է այս աղետը լրջագույն հարված:
Դժվարություններ դեռ շատ ի հայտ կգան, շարունակեց նա, մի քանի օրից կվերջանա պարենը, ոչ բոլոր ընտանիքներն են, որ ունեն պահեստավորված սնունդ։ Եվ համապատասխան մարմինների կողմից պարեն չհասցնելու դեպքում մարդիկ ապավինած կլինեն իրենց ծանոթների պարեններին։
Նրա խոսքով՝ հիմա աշխատանքներ են տարվում գործուն դարձնելու այլընտրաքային ճանապարհը, բայց այստեղ ևս ամեն ինչ հարթ չէ։
«Հիմա այլընտրանքային ճանապարհի մաքրմամբ են զբաղված, որով հնարավոր կլինի սնունդ մատակարարել բլոկադայի մեջ հայտնված բնակավայրեր։ Այլընտրանքային ճանապարհն Ալավերդի քաղաքից դեպի սահմանային Ջիլիզա գյուղն է և Ջիլիզա գյուղից դեպի Շամլուխ քաղաք, որը ևս գտնվում է շրջափակման մեջ։ Այդ ճանապարհը լեռնային բարձր ճանապարհ է, որը ժամանակին օգտագործվել է փայտանյութի տեղափոխման համար։ Իրականում այդ ճանապարհը դժվարանցելի է։ Դեպի գյուղ ճանապարհը կկազվի 80 կմ»,- ասաց նա։
Դուլգարյանն ավելացրեց, որ մարդիկ այս պահին սպասում են, թեև այլընտրանքային ճանապարհը մեծ ոգևորություն չի առաջացնում նրանց շրջանում, որովհետև այն հասանելի չի լինելու բոլոր տեսակի մեքենաների և մարդկանց համար։
«Այսօր ես հետաքրքվում էի, թե ինչքանով մեքենան մարդկանց այդտեղից կտեղափողի մեկ այլ վայր, ասացին 40 հազար դրամ, իսկ դա բավականին թանկ է»,- ընդգծեց մեր զրուցակիցը։
Ապա ավելացրեց. «Մարդիկ կան, որոնք իրենց աճեցրած բերքը պետք է դուրս բերեն՝ վաճառելու նպատակով, մարդիկ կան, ովքեր զբոսաշրջությամբ են զբաղվում, սակայն զբոսաշրջիկներն այլևս չեն կարող գալ: Մի խոսքով, տնտեսական ծանր դրություն է մարզում»։
Խոսելով հիմնական կամրջի մասին, որը ջուրը քանդել է, Օլեգ Դուլգարյանը նշեց, որ այս պահին ծանր տեխնիկան տարածքում է, աղբից է մաքրում։
«Հուսանք՝ կվերակագնվի հիմնական ճանապարհը»,- հավելեց նա։
Վիկա Աբգարյան