ԱՄՆ Վիրջինիա նահանգում ինքնաթիռ է կործանվել․ գրում է Reuters-ը։
Գործակալության տվյալներով՝ բիզնես-ջեթը խախտել է ամերիկյան մայրաքաղաքի օդային տարածքը՝ չպատասխանելով կարգավարների հաղորդագրություններին, որից հետո կործանվել է հարեւան Վիրջինիա նահանգում։ Կապ հաստատելու համար օդ են բարձրացվել կործանիչներ, որոնք ազդանշանային հրթիռներ են կիրառել, սակայն օդաչուները չեն արձագանքել։
Ըստ հաղորդագրության` ինքնաթիռում 4 մարդ է եղել․ ողջ մնացածներ չկան։
Ավելի վաղ ամերիկյան լրատվամիջոցները հայտնել էին Վաշինգտոնում «պայթյունի» ձայների մասին։
Աննապոլիս (Մերիլենդ) քաղաքի արտակարգ իրավիճակների տնօրինության տվյալներով՝ բարձր ձայնն առաջացել է «ԱՄՆ պաշտպանության նախարարության կողմից լիազորված թռիչքից»։
ԱՄՆ Դաշնային ավիացիոն վարչությունը (FAA) պարզաբանել է, որ ինքնաթիռը օդ է բարձրացել Էլիզաբեթթոն օդանավակայանից (Թենեսի) և շարժվում էր դեպի Նյու Յորքի Լոնգ Այլենդ ՄաքԱրթուր օդանավակայան։ Այն վթարի է ենթարկվել 15:00-ի սահմաններում լեռնային տեղանքում։