ՀԱՊԿ գլխավոր քարտուղար Ստանիսլավ Զասն անդրադարձել է Հայաստանին օգնություն տրամադրելու վերաբերյալ փաստաթղթի ստորագրման հնարավորությանը։
Ստանիսլավ Զասը հիշեցրել է, որ տեղի են ունեցել Հավաքական անվտանգության խորհրդի (ՀԱԽ) 5 արտահերթ նիստեր, երեք անգամ՝ Հայաստանի վարչապետ Նիկոլ Փաշինյանի դիմումով։ Նրա խոսքով՝ ցուցաբերվել է մեծ օպերատիվություն, երբ սեպտեմբերի 13-ին սկսվել են բախումները, նույն օրը օնլայն ձեւաչափով տեղի է ունեցել հավաքական անվտանգության գագաթաժողով, ընդունվել է որոշում մոնիթորինգային առաքելություն ուղարկելու մասին։ Մեկ օր հետո վայրէջք է կատարել ինքնաթիռը՝ առաքելության առաջնային խմբով։
«Հայաստանում ՀԱՊԿ առաքելության գործունեության արդյունքներով պատրաստվել էր Հավաքական անվտանգության խորհրդի որոշման նախագիծ՝ Հայաստանի Հանրապետությանը օգնություն ցուցաբերելու համատեղ միջոցառումների մասին, որը քննարկվեց նոյեմբերի 23-ին Երևանում կայացած Հավաքական անվտանգության խորհրդի նիստում։
Ուզում եմ հույս հայտնել, որ համապատասխան լրամշակումներից հետո մենք կհասնենք երկու շատ կարևոր, փոխլրացնող փաստաթղթերի՝ Հայաստանի Հանրապետությանը օգնություն ցուցաբերելու մասին Հավաքական անվտանգության խորհրդի որոշման և հաջակցություն Հարավային Կովկասում խաղաղություն հաստատելու ջանքերի՝ ՀԱՊԿ երկրների ԱԳ նախարարների խորհրդի հայտարարության ընդունմանը»,- 2022 թվականին ՀԱՊԿ գործունեության արդյունքների ամփոփմանը նվիրված ասուլիսում ասել է Զասը։