Ես համոզված եմ, որ Արցախի խնդիրը գլխովին լուծված է, ու միակ մարդը, որ դրա մասին ճիշտը խոսում է՝ Ալիեւն է. նա ուղիղ ասում է՝ Արցախի խնդիր չկա․ MediaHub-ի հետ զրույցում ասում է գրականագետ Սերժ Սրապիոնյանը՝ խոսելով Արցախում ստեղծված իրավիճակի մասին։
Արդեն 8-րդ օրն է Արցախը Հայաստանին կապող միակ ճանապարհը ադրբեջանցիները հրաժարվում են բացել։ Սրապիոնյանի խոսքով՝ ստեղծված իրավիճակի պատասխանատուն ոչ թե ռուսներն են, ինչպես պնդում են իշխանությունները, այլ հենց իրենք։ Ըստ գրականագետի՝ Արցախի մնացած տարածքը կիսանկախ պահելու շահագրգիռ կողմը, շահառուն ռուսներն են՝ իրենց ներկայությունն այստեղ ապահովելու համար։
«Հայաստանի իշխանությունները, թուրք-ադրբեջանական տանդեմի հետ ձեռք ձեռքի տված, Արցախի «գլխացավանքից» ուզում են ազատվել՝ տալիս են հնարավորինս անաղմուկ։ Պատահական չէին այս դեպքերից առաջ իշխանական թեւի արած հայտարարությունները։ Շատ պարզ երեւում է, որ բանավոր պայմանավորվածությամբ, թե գաղտնի փաստաթղթի ստորագրությամբ՝ իրենք այդ խնդիրը համարում են լուծված։ Ես նույնիսկ չեմ կասկածում, որ իշխանություններն Արցախը հանձնել են Ադրբեջանին»,-ասաց գրականագետը։
Այն, որ Փաշինյանն ու իր թիմը խոսում են ոչ թե Արցախի կարգավիճակի, այլ այնտեղ ապրող «էթնիկ հայերի» մասին, նշանակում է ձեռքերը լվացել են Արցախից։
«Տեսեք՝ ինչ կեղծավոր են, նրանք խոսում են ոչ թե Արցախի Հանրապետության կարգավիճակի, այլ հնարավոր ցեղասպանության մասին այնպիսի անտարբերությամբ, ինչպես, օրինակ, կխոսեին հրապարակի տոնածառը զարդարելու մասին։ Ցեղասպանություն բառն այնպիսի հանգստությամբ են գործածում, որ զարմանում ես»,-նշեց նա։
Անդրադառնալով ժողովրդի անտարբերությանն ու Արցախի նկատմամբ քամահրական վերաբերմունքին՝ գրականագետը շեշտեց՝ ջայլամային, ապատիկ վիճակ է, ամեն ինչ անում են, որ մոռանան Արցախի մասին։
«Ես չեմ մեղադրում մարդկանց, ովքեր ցանկանում են նշել ամանօրը, բայց ցավալի է, որ կարեւորն անկարաեւորից ժողովուրդն այլեւս չի զանազանում։ Ըստ էության, մարդիկ իրենց համար խնդիր են համարում ամանօրը հնարավորինս անխափան նշելը։ Մոռացե՛ք, որ ամանորից հետո Արցախի խնդրով կսկսեն հետաքրքրվել։ Զատիկն էլ կանցնի, մեկ այլ պատճառաբանություն կգտնեն։ Ջայլամային մտածելակերպ է, ամեն ինչ կանեն, որ այդ հարցին չառնչվեն»,-ասաց նա:
Ճշտող հարցին՝ իր կարծիքով, Փաշինյանն Ալիեւի հետ բանակցել ու Արցախը հանձնե՞լ է, Սրապիոնյանն ասաց՝ այո, դրանում չի կասկածում։ «Դա իմ կարծիքն է, ու դրան որեւէ հակափաստարկ չեն կարող բերել։ Ալիեւը շատ հստակ հայտարարում էր, որ իրենք պայմանավորվածություն ունեն ու Հայաստանի ղեկավարն այդ պայմանավորվածությունները չի կատարում։ Հիքմեթ Հաջիեւը շատ հստակ հայտարարեց, որ եթե Շուշին կռվով են վերցրել, Երեւանը կվերցնեն խաղաղ ձեւով, քայլելով։ Այդ մակարդակի պաշտոնյան այդպիսի ամպագորգոռ հայտարարություն չէր անի։ Նշանակում է՝ ինքը տիրապետում է ինչ-որ մի ինֆորմացիայի, որին մենք չենք տիրապետում»,-հավելեց Սրապիոնյանը։
Լիա Սարգսյանը