Ո՞վ կամ ի՞նչն է խանգարում բանակցություններին
Առայժմ հանգուցալուծված չէ Քարագլուխ բարձունքի շուրջ զարգացող ճգնաժամը․ պաշտոնական Բաքուն ու Մոսկվան գտնվում են հրապարակային դիվանագիտական «փոխհրաձգության» ռեժիմում։
Մյուս կողմից, դիվանագիտական «պատերազմը» շարունակվում է պաշտոնական Երևանի ու Բաքվի միջև։
Հայաստանի իշխանությունը խաղաղության պայմանագրի բանակցությունների տապալման մեջ մեղադրում է Ադրբեջանին, որը վարում է ագրեսիվ քաղաքականություն։
Ադրբեջանի արտաքին գործերի նախարարությունը երեկ հաղորդագրություն է տարածել՝ մարտի 28-ին ՀՀ Անվտանգության խորհրդի տարածած հայտարարության վերաբերյալ։ Հաղորդագրության մեջ մասնավորապես նշվում է, որ «տարածաշրջանում լարվածության աճի անմիջական պատճառը Հայաստանի կողմից ստանձնած պարտավորությունների չկատարումն է»։
Ադրբեջանի ԱԳՆ-ն կոչ է արել Հայաստանին կոնկրետ քայլեր ձեռնարկել խաղաղության պայմանագիր կնքելու համար։
«Եթե հայկական կողմը խաղաղության պայմանագրի հարցը համարում է լուրջ քայլ, այլ ոչ թե հերթական հանրային իրազեկման քարոզարշավ, ապա ժամանակն է անցնել կոնկրետ քայլերի։ Եվս մեկ անգամ ընդգծում ենք, որ Ադրբեջանն, իր հերթին, պատրաստ է դրան»,- ասել են ԱԳՆ-ում։
Բաքուն պնդում է, որ մեկ տարի առաջ հանդես է եկել խաղաղության պայմանագրի ստորագրման առաջարկով, իսկ մեկ ամիս առաջ հայտարարել է կոնկրետ կետերի մասին, որոնց վրա պետք է հիմնված լինի փաստաթուղթը։
Ադրբեջանի ԱԳՆ հայտարարության հատկապես վերջին դրվագը տարակուսելի է, մանավանդ, որ պաշտոնական Երևանը հրապարակավ հայտարարել է, թե ընդունում է Բաքվի առաջ քաշած հինգ սկզբունքները ու դիմել է ԵԱՀԿ ՄԽ-ին՝ բանակցություններ կազմակերպելու խնդրանքով։
Արդյո՞ք Բաքուն դեմ է ԵԱՀԿ ՄԽ միջնորդությանը, թե՞ Ադրբեջանն առհասարակ դեմ է խաղաղության գործընթացին ու պատրվակ է փնտրում՝ այն վիժեցնելու համար։ Այս հարցերի պատասխանները կստանանք առաջիկա օրերին։
Վահրամ Բագրատյան
