Բայդենի վարչակազմից պաշտոնյաները մտահոգություններ ունեն, որ Չինաստանը կարող է Թայվանի երկինքն արգելված գոտի սահմանել Ներկայացուցիչների պալատի խոսնակ Նենսի Փելոսիի հնարավոր այցին ընդառաջ՝ ուղեւորությունը խափանելու համար, ինչը կարող է էլ ավելի սրել լարվածությունը տարածաշրջանում, հայտնում է CNN-ը՝ վկայակոչելով ամերիկացի պաշտոնյային:
Չինաստանը նաեւ կարող է արձագանքել՝ կործանիչներ ուղարկելով Թայվանի ինքնահռչակ ՀՕՊ գոտի, ինչը կարող է առաջացնել Թայվանի եւ ԱՄՆ-ի արձագանքը, հավելել է պաշտոնյան։ Նա, սակայն, չի մանրամասնել, թե ինչ հնարավոր արձագանքի մասին է խոսքը:
Երեք աղբյուրների համաձայն՝ Փելոսին առաջիկա շաբաթներին նախատեսում է մեկնել Թայվան։ Փելոսին կդառնա վերջին 25 տարվա ընթացքում Թայվան այցելած ամենաբարձրաստիճան ամերիկացի օրենսդիրը։
Նախագահ Ջո Բայդենը հայտնել է ԱՄՆ զինվորականների մտահոգությունների մասին Փելոսիի հնարավոր այցի կապակցությամբ. «Ես կարծում եմ, որ զինվորականները դա վատ գաղափար են համարում»:
Փելոսին ասել է, որ կարեւոր է աջակցություն ցուցաբերել Թայվանին՝ նշելով, որ ուղեւորության հետ կապված պլանները չի քննարկի՝ անվտանգության խնդիրների պատճառով: Փելոսին ասել է, «ականջի ծայրով» լսել է Բայդենի մեկնաբանություններն իր հնարավոր այցի մասին, բայց անմիջապես նախագահից ոչինչ չի լսել: «Կարծում եմ՝ նախագահը նկատի ուներ, որ գուցե զինվորականները վախենում էին, որ իմ ինքնաթիռը կխոցվի կամ նման մի բան: Հստակ չգիտեմ»,- ասել է Փելոսին։
Երկու աղբյուրների փոխանցմամբ՝ Պետքարտուղարության պաշտոնյաները եւս որոշ մտահոգություններ ունեն: Պետքարտուղարության ներկայացուցիչ Նեդ Փրայսը կրկնել է, որ Բայդենի վարչակազմը հավատարիմ է մնում մեկ Չինաստանի իր քաղաքականությանը՝ նշելով, որ ԱՄՆ-ն դիվանագիտական հարաբերություններ չունի Թայվանի հետ, բայց «վստահելի ոչ պաշտանական» հարաբերություններ ունի կղզու հետ։
Ավելի վաղ Չինաստանի ԱԳՆ-ն հայտարարել էր, որ Փելոսիի այցը կխախտի «Մեկ Չինաստան» սկզբունքը եւ չին-ամերիկյան երեք համատեղ կոմյունիկեների դրույթները եւ կվնասի Չինաստանի ինքնիշխանությանը եւ տարածքային ամբողջականությանը։