Պակիստանը կոչ է արել միջազգային հանրությանը շտապ օգնություն ցուցաբերել հորդառատ անձրեւների հետեւանքների վերացման համար, որոնք անցյալ ամիս զանգվածային ջրհեղեղների պատճառ դարձան։ Ջրհեղեղների հետեւանքով զոհվել է ավելի քան 800 մարդ, հայտնում է Reuters-ը՝ վկայակոչելով երկրի պաշտոնյաներին:

Ֆինանսավորումը եւ վերակառուցումը մարտահրավեր կլինեն դրամական միջոցների սահմանափակման մեջ գտնվող Պակիստանի համար, որը ստիպված է կրճատել ծախսերը, որպեսզի Արժույթի միջազգային հիմնադրամը հաստատի այդքան անհրաժեշտ միջոցները:

Հուլիսին երկրում անձրեւները միջինից գրեթե 200 տոկոսով բարձր էին, ինչը հուլիսն ամենաթացը դարձրեց 1961-ից ի վեր, գործակալությանը ասել է մետրոլոգիական վարչության ավագ պաշտոնյա Սարդար Սարֆարազը:

Պակիստանում հունիսի կեսերից հորդառատ մուսոնային անձրեւների ու ջրհեղեղների հետեւանքով տուժել է մոտ 2.3 միլիոն մարդ, ավերվել է առնվազն 95.350 տուն, եւս 224.100 տուն վնասվել է, վկայում են ՄԱԿ-ի հումանիտար հարցերի համակարգման գրասենյակի տվյալները:

Առավել տուժած նահանգներ են Սինդը՝ երկրի հարավ-արեւելքում եւ Բելուջիստանը՝ հարավ-արեւմուտքում: Ավելի քան 504.000 անասուն սատկել է, գրեթե բոլորը՝ Բելուջիստանում, իսկ գրեթե 3000 կմ ճանապարհների եւ 129 կամուրջների վնասումը դժվարացրել է տեղաշարժը ջրհեղեղից տուժած շրջաններով:
Կարաչի նավահանգստային քաղաքից մատակարարման հիմնական երթուղին ավելի քան մեկ շաբաթով ընդհատվել է Բելուջիստանին միացնող կամուրջի փլուզումից հետո, իսկ նահանգում տասնյակ փոքր ամբարտակներ լցվել են:

Սինդ նահանգում կառավարությունը փակել է բոլոր ուսումնական հաստատությունները՝ չորեքշաբթի եւ հինգշաբթի օրերին ավելի շատ անձրեւների սպասելով, իսկ Նավաբշահ շրջանի օդանավակայանը փակ է մնում, քանի որ օդանավակայանը գրեթե ամբողջությամբ հեղեղված է:

«Դաշնային կառավարությունն օգնություն է խնդրել զարգացման միջազգային գործընկերներից՝ ջրհեղեղների հետեւանքով ավերված ենթակառուցվածքների վերականգնման համար»,- Twitter-ում գրել է պլանավորման, զարգացման եւ հատուկ նախաձեռնությունների նախարար Ահսան Իքբալը:

Պակիստանի պաշտոնական ներկայացուցիչները վախենում են, որ սա էպիկական չափերի կլիմայական աղետ է, որն իր մասշտաբով համեմատելի է 2010 թվականին տեղի ունեցած մեծ ջրհեղեղի հետ համեմատելի հումանիտար ճգնաժամի կհանգեցնի։