Ի՞նչ ունեցվածք ուներ ԱԺ պատգամավոր Արսեն Թորոսյանը 2023 թվականի վերջին

ԱԺ պատգամավոր, առողջապահության նախկին նախարար Արսեն Թորոսյանը, համաձայն այս տարվա մայիսին ներկայացրած իր հայտարարագրի, 2023 թվականի սկզբում ունեցել է մեկ անհատական բնակելի տուն՝ հողամասի վրա կառուցված, իր տնտեսական շինություններով, որը գտնվում է Երևանի Նոր Նորք վարչական շրջանում, ինչպես նաև երեք հողամաս, որոնցից երկուսը՝ Արագածոտնի մարզի Փարպի գյուղում և մեկը՝ Կոտայքի մարզի զբոսաշրջային կենտրոն համարվող Ծաղկաձոր քաղաքում։ Տարվա վերջին պատգամավորը 3 մլն 300 հազար և 4 մլն 500 հազար դրամով վաճառել է Փարպիում գտնվող իր երկու հողամասերը։ 

Որպես շարժական գույք Թորոսյանը հայտարարագրել է 2015 թվականի Mercedes-Benz մակնիշի ավտոմեքենա, թեպետ մեր տեղեկություններով՝ նա այլ մեքենաներ էլ ունի։

Նա նաև 15 մլն 750 հազար և 1 մլն 750 հազար դրամի փոխառություն ունի տված «Ծաղկաձոր Պարկ» ՍՊԸ-ին։

2023 թվականի վերջին Արսեն Թորոսյանի բանկային հաշիվներին եղել է 1355 եվրո, 88 դոլար և 686 հազար 290 դրամ։ Որպես կանխիկ դրամ Թորոսյանի ձեռքին տարվա վերջին եղել է 1 մլն դրամ։

Հաշվետու տարում ՔՊ-ական պատգամավորի եկամուտները կազմել են ընդհանուր 34 մլն 017 հազար 216 դրամ, որից 9 մլն 755 հազար 130 դրամը՝ աշխատանքի վարձատրություն, իսկ 15 մլն 750 հազար դրամը՝ Ամերիաբանկից ստացված փոխառություն, որը, ինչպես վերևում նշվեց, հետո նա տրամադրել է «Ծաղկաձոր Պարկ» ՍՊԸ-ին։

Վահե Մակարյան