Ուկրաինայից հացահատիկի արտահանման հարցով Ստամբուլի համատեղ համակարգող կենտրոնը կղեկավարի թուրք ծովակալը. այդ մասին հայտնում է Türkiye թերթը։
Նշվում է, որ Համատեղ համակարգման կենտրոնում, որը կստեղծվի Ստամբուլի Ազգային պաշտպանության համալսարանում, կընդգրկվի 20 մարդ։ Նրանց թվում են Ուկրաինայի, Ռուսաստանի, ՄԱԿ-ի և Թուրքիայի քաղաքացիական և ռազմական ներկայացուցիչներ։ Կենտրոնը կղեկավարի թուրք ծովակալը, որը կորոշի Ազգային պաշտպանության նախարարությունը։ Ակնկալվում է, որ կենտրոնը կգործի հնարավորինս շուտ։
Նաև, ըստ թերթի, Ռուսաստանի և Ուկրաինայի զինվորականները կհանդիպեն միայն ըստ անհրաժեշտության և կաշխատեն տարբեր գրասենյակներում։
Հուլիսի 22-ին Ստամբուլում Ռուսաստանի, Ուկրաինայի, Թուրքիայի և ՄԱԿ-ի ներկայացուցիչները համաձայնագիր են ստորագրել Սև ծովով ուկրաինական հացահատիկի արտահանման մասին։ Գործարքը վերացրել է համաշխարհային շուկա ռուսական գյուղատնտեսական արտադրանքի մատակարարման սահմանափակումները և որոշել է սևծովյան տարածքով ուկրաինական հացահատիկի արտահանման ալգորիթմը։
Ինչպես պարզաբանել է ՌԴ արտգործնախարար Սերգեյ Լավրովը՝ երրորդ կողմը Ռուսաստանի և Թուրքիայի հետ միասին կապահովի ուկրաինական հացահատիկով նավերի անվտանգությունը։ Նրա խոսքերով՝ Ուկրաինան երաշխիքներ կտա տարածքային ջրերի մաքրման համար, ինչը կապահովի նավերի անարգել ելքը։