Նոյեմբերի 5-ին Ֆրանսիայի հրապարակում նախատեսված է ընդդիմության հանրահավաքը: Իշխանությունն էլ որոշել է յուրովի խանգարի դրա անցկացմանը:

MediaHub-ի աղբյուրները տեղեկացնում են, որ Կառավարությունը նոյեմբերի 5-ը հայտարարել է ծառատունկի օր՝ այդպես լուծելով պետական գերատեսչությունների աշխատակիցների զբաղվածության հարցը:

«Նախարարությունների աշխատակիցներին շաբաթ օրը՝ նոյեմբերի 5-ին կանչել են ծառատունկի: Ծառատունկը մարզերում է նախատեսված»,- ասաց մեր աղբյուրը:

Վերջինս նշեց, որ որոշումը նոր է կայացվել, այսինքն դեռ երկու շաբաթ առաջ աշխատակիցները սպասվող ծառատունկի մասին տեղեկացված չեն եղել: 

«Մենք շատ լավ հասկանում ենք, թե խնդիրը որն է՝  նախարարությունների աշխատողները հանկարծ չմասնակցեն հանրահավաքին»,- ասաց նա:

Այս պահին հայտնի է, որ ՀՀ տարածքային կառավարման նախարարության աշխատակիցներին են հրահանգել մասնակցել ծառատունկին, բայց ինքը տեղյակ է, որ խոսքը բոլոր գերատեսչությունների մասին է:

«Սա ներքին հրահանգ է: ՏԿԵ-ի ժողովուրդը, օրինակ, Լոռիում է ծառատունկի մասնակցելու»,- ասաց մեր զրուցակիցը: 

Իհարկե, ասաց նա, տեղյակ չի, որ եթե չմասնակցեն ինչ կլինի, բայց վստահ է, որ հաստատ «այդ աշխատակիցների անունները հատուկ ցուցակներով կպահվեն»:

Լիա Սարգսյան