«Փաշինյանի հայտարարությունները չենք մեկնաբանում»․ Արցախի նախագահական

Նիկոլ Փաշինյանը երեկ ԱԺ ամբիոնից հայտարարեց, որ Արցախը նախկին երկու նախագահները՝ Ռոբերտ Քոչարյանն ու Սերժ Սարգսյանն են ճանաչել Ադրբեջանի մաս, և դա գաղտնիք չէ։ Նա նշեց, որ փորձել է պայքարել դրա դեմ, սակայն, ցավոք չի հաջողել ու չի հաջողելու։

Փաստացի, ՀՀ ղեկավարը վերջնակմանապես հայտարարեց, որ Արցախը ճանաչում է Ադրբեջանի մաս, և դա իր մեղքով չէ, այլ՝ նախկինների։ Նա նաև հստակեցրեց, որ ինքը պատասխանատու է մի բանի համար՝ խաղաղության դարաշրջանի գաղափարն իրագործելու։

MediaHub.am-ը Փաշինյանի հայտարարության վերաբերյալ մեկնաբանություն է խնդրել Արցախի նախագահի գրասենյակից։ Պատասխանը լակոնիկ էր.

«ՀՀ և ԱՀ շուրջ ստեղծված իրավիճակի և հայության առջև ծառացած մարտահրավերների վերաբերյալ ԱՀ իշխանություների տեսակետը ևս մեկ անգամ արտահայտվել է օրեր առաջ Արցախի հանրապետության անվտանգության խորհրդի նիստում ընդունված հայտարարությամբ: 2022 թ. հոկտեմբերի 5-ին ՀՀ Աժ-ում ՀՀ վարչապետ Նիկոլ Փաշինյանի հնչեցրած հայտարարությունները չենք մեկնաբանում»,- ասված է նախագահականից ստացված պատասխանում։

Հիշեցնենք, որ Արցախի ԱԽ ընդունած հայտարարության տեքստում նշվում էր, որ Արցախի համար անընդունելի է որևէ փաստաթուղթ, որը կարող է անտեսել ղարաբաղյան հակամարտության գոյությունը, հարվածի տակ դնել դրա արդարացի կարգավորման հեռանկարը և սահմանափակել Արցախի ժողովրդի ինքնորոշման իրավունքի և դրա իրացման արդյունքների միջազգային ճանաչման հնարավորությունները, այդ թվում՝ տարածքային ամբողջականության սկզբունքի հանդեպ դրա ստորադասման կեղծ օրակարգով։

«Համազգային արժեքներն ու շահերը ենթադրում են, որ անկախ ամեն ինչից՝ Մայր Հայաստանը պետք է մշտապես լինի Արցախի կողքին բոլոր ուղղություններով, հատկապես՝ Արցախի ժողովրդի անվտանգության երաշխավորման և ինքնորոշման իրավունքի միջազգային ճանաչման առումներով։

Շեշտադրում ենք, որ քանի դեռ Արցախի Հանրապետությունը չի ընդգրկվել հակամարտության կարգավորման գործընթացում լիիրավ հիմունքներով և միջազգային բարձր ձևաչափի շրջանակներում, Հայաստանի Հանրապետությունն է պարտավորված ու լիազորված ներկայացնելու և պաշտպանելու Արցախի ժողովրդի իրավունքներն ու շահերը միջազգային հարթակներում։ Մենք պատրաստ ենք Ադրբեջանի հետ բանակցություններ վարել հակամարտության կարգավորման շուրջ՝ բանակցային լիարժեք ձևաչափի վերականգնման դեպքում, որտեղ Արցախի Հանրապետությունը ճանաչված է որպես լիիրավ կողմ։ Անհերքելի է, որ Արցախի ապագայի շահառուն ողջ հայ ժողովուրդն է, և Հայաստանի ու Արցախի շահերը պետք է դիտարկել մեկ ամբողջության մեջ»,- ասված էր Արցախի ԱԽ տարածած հայտարարությունում։

Նարե Գնունի