Այս պահին իրավիճակը գյուղում հանգիստ է, մեզ մոտ կրակոցներ լինում են, բայց ժամանակ առ ժամանակ: Այս մասին MediaHub․am-ի հետ զրույցում ասաց Ելփինի գյուղապետ Անդրանիկ Աղախանյանը՝ անդրադառնալով այսօր թշնամու կողմից իրականացրած սարդանքին։

Նա նշեց, որ բնակիչների մոտ խուճապ չկա:

«Այս անգամ մի քանի րոպեի ընթացքում չորսից հինգ կրակոց է հնչել, կարող եմ ասել, որ մեծ տրամաչափի փամփուշտներ էին»,- ներկայացրեց նա:

Գյուղապետը հայտնեց, որ վնասվել է բնակիչներից մեկի մեքենան, որը գյուղից գնում էր դեպի Երեւան։

«Մեքենան եղել է մարդատար, ուղևորները ճանապարհին կանգ են առել, որ ուտելիք գնեն, այդ պահին փամփուշտը մտել է ավտոմեքենայի մեջ, մյուս կողմից դուրս եկել: Ենթադրում եմ՝ փամփուշտն է շեղվել ուղղությունից եւ հասել ավտոմեքենային»,- ասաց գյուղապետը:

MediaHub.am-ը կապ հաստատեց նաև Արենի համայնքի ղեկավար Հուսիկ Սահակյանի հետ, ով նշեց, որ գյուղում ոչ մի խուճապային տրամադրություն չի եղել և չի էլ լինի։

«Մանրամասների համար դիմեք Պաշտպանության նախարարություն», - ասաց նա։

Հիշեցնենք, որ Պաշտպանության նախարարության տարածած հայտարարության համաձայն՝ այսօր՝ հուլիսի 7-ին՝ ժամը 16։15-ի սահմաններում, Ադրբեջանի ԶՈՒ ստորաբաժանումները տարբեր, այդ թվում նաև խոշոր տրամաչափի հրաձգային զինատեսակներից կրակ են բացել հայ-ադրբեջանական սահմանի արևմտյան, մասնավորապես՝ Վայոց Ձորի մարզի Ելփին գյուղի հատվածում տեղակայված հայկական մարտական դիրքերի, ինչպես նաև դեպի գյուղ տանող ճանապարհի ուղղությամբ, ինչի հետևանքով վնասվել է քաղաքացիական ավտոմեքենա։

Մերի Գևորգյան