Ահաբեկիչ և Արցախում հայերի դեմ կռված Շամիլ Բասաեւի խմբավորման չորս անդամներ դատապարտվել են մինչև 24 տարվա ազատազրկման՝ 2000 թվականին Չեչնիայում Պսկովի դեսանտայինների վրա հարձակման համար, հաղորդել է ՌԴ ԱԴԾ հասարակայնության հետ կապերի կենտրոնը։
«Ռուսաստանի Դաշնության Անվտանգության դաշնային ծառայությունը, առաջնորդվելով պատժի անխուսափելիության սկզբունքով, շարունակում է որոնել Շ. Բասաեւի և Խաթթաբի ավազակախմբերի բոլոր անդամներին, որոնք ներգրավված են Չեչնիայի Հանրապետության Շատոյի շրջանի Ուլուս-Կերտ գյուղի մոտ Պսկովի դեսանտայինների վրա հարձակման համար, որի հետևանքով զոհվել է 84 զինծառայող»,- հայտնել է ԱԴԾ-ն։
Ռուսաստանի Դաշնության Քննչական կոմիտեի հետ համատեղ աշխատանքի ընթացքում ստեղծվել է անհերքելի ապացույցների բազա՝ այս հանցագործությանը մասնակցելու վերաբերյալ՝ 1973 թվականին ծնված Մուխամետգալիև Իլգիզի, 1976 թվականին ծնված Շայխուտդինով Մուխամեդվալիի, 1967 թվականին ծնված Ռազակով Խայդարի և 1966 թվականին ծնված Գումերով Իլգամի, որոնք չեն ենթարկվել քրեական պատասխանատվության դրա համար։
2022 թվականի ապրիլին այդ անձինք ձերբակալվել և հանձնվել էին նախաքննական մարմնին։ Բոլոր մեղադրյալներին մեղադրանք է առաջադրվել Ռուսաստանի Դաշնության քրեական օրենսգրքի 209-րդ (ավազակային հարձակում), 279-րդ (զինված ապստամբություն) և 317-րդ (զինծառայողի կյանքի դեմ ուղղված փորձ) հոդվածներով և ընտրվել է խափանման միջոց՝ կալանք։
Ռազմական դատարանը մեղավոր է ճանաչել Մուխամետգալիևին, Շայխուտդինովին, Ռազակովին, Գումերովին և դատապարտել է 13-ից 24 տարի ազատազրկման՝ խիստ ռեժիմի ուղղիչ գաղութում դրանք կրելու համար։
Դատավճիռները դեռևս ուժի մեջ չեն մտել։
Շարունակվում են աշխատանքները՝ անցյալ տարիների ահաբեկչական հանցագործությունների մասնակիցներին գտնելու ուղղությամբ։