Ըստ հայաստանյան տուրիստական գործակալությունների ներկայացուցիչների՝ տարեցտարի հայերը Ամանորյա սեղաններ պատրաստելու և հյուրեր դիմավորելու փոխարեն նախընտրում են տոներին հանգիստը կազմակերպել այս կամ այն երկում։
Արդյո՞ք մեր քաղաքացիներն ըստ սրտի նախընտրության են մեկնում Ամանորին հանգստանալու, թե վայրը համապատասխանեցնում են գրպանի հետ. ոլորտի պատասխանատուները շեշտում են միանշակ երկրորդը, իսկ թե որտեղ և ինչ գներով՝ MediaHub-ը պարզեց և ներկայացնում է ստորև։
«Եգիպտոս, Դուբայ, Մալդիվներ, Շրի Լանկա․ սրանք այն երկրներն են, որտեղ այս տարի հայերը նախընտրում են Ամանորին հանգստանալ՝ հիմնականում ընտանիքներով»,- ասում է «Go Travel» տուրիստական ընկերության մենեջեր Արմինե Դավթյանը։ Նրա խոսքով՝ անցած տարի էկզոտիկ երկրներ գնալու ավելի քիչ հնարավորություններ կար, քանի որ շատ երկրներ փակ էին կորոնավիրուսի պանդեմիայի պատճառով, բայց այս տարի մի շարք երկրներում հանվել են այդ սահմանափակումները։
Ամանորին հանգստանալու համար հայերն ամրագրումները սկսել են նոյեմբերի սկզբից, իսկ գները Նոր տարվա հետ պայմանավորված բարձրացել են։ Գների բարձրացման մասով ընկերության մենեջերը հավելեց, որ այժմ Հայաստանում ամեն ինչի գներն են բարձրանում։ «ՕԱԶԻՍ ԹՐԵՎԼ» տուրիստական գործակալության տնօրեն Աստղիկ Ասոյանն էլ նախընտրելի երկրների շարքում ավելացնում է Միացյալ Արաբական Էմիրությունները, շատ քիչ տոկոս էլ բաժին է հասնում Եվրոպական երկրներին։ Ըստ նրա՝ ամանորյա հանգիստը կազմակերպելու տեսանկյունից արտերկիրն ավելի մատչելի է, քան Հայաստանը, քանի որ մեր երկրում գները բավականին բարձր են. մարդիկ հիմնականում գնում են Ծաղկաձոր, բայց տուրիստական գործակալությունն այս տարի Հայաստանում Ամանորի համար ընդհանրապես ամրագրում չի արել.
«Գները կախված են նրանից, թե ինչ հյուրանոց կընտրեն, օրինակ՝ Եգիպտոսի դեպքում մեկ անձը նվազագույնը 800 կամ 900 դոլարից է սկսվում՝ 6 գիշերվա համար»,-ասաց Ասոյանը։
«ՌԻՄԱ ԹՐԵՎԼ» տուրիստական գործակալության ղեկավար Ռիմա Խաչատրյանն էլ նախընտրելի երկրների շարքում նշում է Դուբայը և Վրաստանը. վերջին երկիրն ամենամատչելին է համարվում.
«Գնում են նաև Երուսաղեմ, ամբողջական փաթեթի արժեքը 1400 դոլար է։ Դուբայ գնալու համար գումարը կախված է հյուրանոցի կատեգորիայից, օրինակ՝ 5 աստղանի հյուրանոցը 2000-2500 դոլար, նվազագույնը 1200 դոլար է անհրաժեշտ մեկ անձի հանգիստը կազմակերպելու համար»,-ասաց գործակալության ղեկավարը։
Ռիմա Խաչատրյանի խոսքով՝ Հայաստանում ամանորյա հանգիստը կազմակերպելու համար մարդիկ ավելի շատ հակված են Ծաղկաձոր, Աղվերան կամ Դիլիջան գնալու.
«Ջերմուկ մի փոքր խուսափում են գնալ ՀՀ քաղաքացիները, պայմանավորված հայ-ադրբեջական հակամարտությամբ»,- ընդգծեց Խաչատրյանը։
«ԷԹՆԻԿ ԹՐԵՎԼ» տուրիստական գործակալության հիմնադիր Հասմիկ Հովհաննիսյանն ասում է, որ այս տարվա ամանորյա ամրագրումները բավականին ակտիվացել են, հայաստանյան հանգստյան վայրերից միայն Ջերմուկն է, որ մարդիկ մտավախություն ունեն գնալու առումով, իսկ արտերկիր գնալու համար ամենահարմար տարբերակը Վրաստանն է, որը մատչելի է անգամ Հայաստանի հանգստյան վայրերից։
«Ամանորի հետ կապված գները թանկացել են, որն իմ կարծիքով, պայմանավորված է Ռուսաստանից հոսքի հետ, ինչ տրամաբանական է, բայց սխալ, քանի որ դրանից տուժում են մեր հայրենակիցները»,-ամփոփեց Հավհաննսիյանը։
Շուշանիկ Միսկարյան