Սիսիանում ոչ մի եռուզեռ էլ չկա, մարդկանց ուշք ու միտքը Արցախի հարցն է. այս մասին MediaHub-ի հետ զրույցում ասաց ԱԺ «Հայաստան» խմբակցության պատգամավոր Արթուր Սարգսյանը:
Մամուլն այսօր գրել էր, թե Սիսիան համայնքի նախկին ղեկավար, Ազգային ժողովի «Հայաստան» խմբակցության պատգամավոր Արթուր Սարգսյանը որոշել է մասնակցել ընտրություններին՝ հետագայում համայնքի ղեկավար դառնալու մտադրությամբ:
«Նման քննարկում չկա, ես նման որոշում չունեմ, ոչ մի նախընտրական եռուզեռ էլ չկա: Արցախը շուրջ մեկ ամիս է շրջափակման մեջ է, ի՞նչ նախընտրական եռուզեռ»,- ասաց նա:
Ինչ վերաբերում է հարցին, թե, այդուհանդերձ, չի՞ մտածում առաջադրվելու ուղղությամբ, Արթուր Սարգսյանն արձագանքեց.
«Կրկնում եմ՝ որևէ որոշում չկա: Նույնիսկ քննարկում չի եղել՝ թիմով մասնակցել, միայնակ: Դրա ժամանակը չի»:
Նշենք, որ ԿԸՀ այս տարվա առաջին նիստում որոշում կայացվեց Սիսիան համայնքում համամասնական ընտրակարգով անցկացվող համայնքի ավագանու ընտրություններն անցկացնել 2023 թվականի մարտի 26-ին։