Հարկ եմ համարել ՌԴ նախագահին մեր մտահոգությունները փոխանցել։ Այս մասին այսօր հրավիրված ասուլիսի ժամանակ ասաց ՀՀ վարչապետ Նիկոլ Փաշինյանը՝ պատասխանելով լրագրողի այն հարցին, թե Բաքուն արդեն խոսում է ինտեգրացիայի մասին, կարելի՞ է ենթադրել, որ ՌԴ-ն կողմ է այդ ինտեգրացիային կամ առհասարակ ինչպիսինն է ՌԴ-ի դիրքորոշումն այս առումով՝ հաշվի առնելով, որ երեկ Վլադիմի Պուտինն ու Նիկոլ Փաշինյանը հեռախոսազրույց են ունեցել։
«Կոռեկտ չեմ համարում այս հարցերի մասով Ռուսաստանի դիրքորոշումը բարձրաձայնել, այն դեպքում, երբ Ռուսաստանն իր դիրքորոշումը բազմիցս բարձրաձայնել է։ Երեկվա մեր հեռախոսազրույցը ՌԴ նախագահի հետ, հիմնականում, նվիրված է եղել ԼՂ-ում էսկալացիայի վտանգին, ես ուղղակի փոխանցել եմ իմ տեղեկատվությունը, տպավորությունները և նաև ընդգծել եմ, որ կարծում եմ՝ խնդիրներ կան ԼՂ-ում ՌԴ խաղաղապահ ուժերի պատասխանատվության գոտում և ինձ համար ամենակարևոր խնդիրը այս համատեքստում այն է, որ շատ անսպասելի բան է տեղի ունեցել ԼՂ-ում, երբ ռուս խաղաղապահ զորախմբի կենտրոնակայանի դիմաց բողոքի ակցիա է տեղի ունեցել ԼՂ բնակիչների կողմից։ Սա տեղի է ունեցել ոստիկանության ծառայողների սպանությունից հետո։ Ես ուզում եմ ընդգծել, որ սա ևս տեղի է ունեցել ԼՂ ՌԴ խաղաղապահ պատասխանատվության գոտում և սա մտահոգիչ է»,-ասաց նա։
Հարցին, թե որևէ բան ասել է Պուտինը, վերջինս պատասխանեց՝ այո, իհարկե ասել է։ Ճշտող հարցին, թե ինչ է ասել, Փաշինյանն արձագանքեց․
«Կներեք, կոռետ չեմ համարում պատմել մեր ամբողջ խոսակցությունը»,- շեշտեց նա։
Մանրամասները՝ տեսանյութում: