Վերջերս ԱԺ ամբիոնից հայհոյանքներ հնչեցնող, ՀՀ առողջապահության նախկին նախարար, այժմ ԱԺ առողջապահության հարցերի մշտական հանձնաժողովի նախագահ Արսեն Թորոսյանն արդեն հասցրել է ներկայացնել իր 2024 թվականի անշարժ գույքի և եկամուտների մասին հայտարարագիրը, որից տեղեկանում ենք, որ նա ունի մեկ անհատական բնակելի տուն (համատեղ օգտագործման, որը ձեռք է բերել 2011 թվականին) և հողամաս, որը ձեռք է բերել 2020 թվականին՝ գնման եղանակով։ Իսկ ահա հաշվետու 2024 թվականի ընթացքում Թորոսյանը ձեռք է բերել բնակարան Ծաղկաձորում՝ 75,000,000 դրամով։

Հաշվետու տարվա վերջում անշարժ գույքերը պահպանվել են։

Արսեն Թորոսյանը տրանսպորտային միջոց չի հայտարարգրել։ Արժեթղթեր և այլ ներդրումներ պատգամավորը հաշվետու տարում չի հայտարարագրել:

ԱԺ առողջապահության մշտական հարցերի նախագահը 2023  թվականին  է ձեռք բերել Տելեկոմ Արմենիա ԲԲԸ-ի արժեթղթեր՝ 1 մլն 30 հազար դրամի, որը տարվա վերջում զրոյացվել է։ Մյուս նմանատիպ գործարքը դարձյալ 2023-ին է եղել, Թորոսյանը ձեռք է բերել UniCredit Bank Austria AG արժեթուղթեր՝ 49 հազար 500 եվրոյով, որը տարվա վերջում դարձել է 50 հազար 500 եվրո։  

Տարվա սկզբում և վերջում Թորոսյանի հանձնված և վերադարձված փոխառություններից մեկը կազմել է 15 մլն  750 հազար դրամ, մյուսը՝ 1 մլն 750 հազար դրամ։

ԱԺ առողջապահության մշտական հարցերի նախագահի եկամուտը հաշվետու տարվա ընթացքում կազմել է 13 մլն 491 հազար դրամ, որից 10 մլն 20 հազար դրամը ԱԺ-ից ստացված աշխատավարձի գումարն է։

Հաշվետու տարվա դեկտեմբերի 31-ի դրությամբ Արսեն Թորոսյանի հիփոթեքային վարկի մայր գումարը կազմել է 15 մլն 470 հազար դրամ:

Նշենք, որ Արսեն Թորոսյանը հանդիսանում է նաև «ՄԻԲՍ» բժշկական կենտրոնի 10 % բաժնետեր։
Ուսումնասիրելով առողջապահության նախկին նախարարի հայտարարագիրը՝ Mediahub-ը նկատեց, որ Թորոսյանի՝ 2019 թվականի հաշվետու տարվա աշխատավարձի չափը ավելի բարձր է եղել, քան այսօր և կազմել է 18 մլն 183 հազար դրամ։ 2019-ի վերջին բանկում ունեցած ավանդը կազմել է 32 հազար դոլար: Նրա բանկային հաշվին առկա մնացորդը կազմել է 114 հազար դրամ, 15 դոլար եւ 31 հազար եվրո: Բացի այս, Թորոսյանը 2019 թվականի վերջին տրված փոխառության դիմաց ստացել է 573 դոլարի չափով տոկոս:

2024 թվականը Արսեն Թորոսյանը փակել է հաշվին ունենալով  593,593.29 դրամ (տարեսկզբին եղել է 686,290.49 դրամ), 450 եվրո (տարեսկզբին եղել է 1,355.21 եվրո), 46.77 դոլար (տարեսկզբին եղել է 88 դոլար):

Տարեսկզբին Արսեն Թորոսյանը հայտարարագրել է 1,000,000 կանխիկ դրամ, տարեվերջին արդեն կանխիկը եղել է 3,000,000 դրամ:

Էմմա Մարտիրոսյան