Տրամադրվածությունս շատ լավ է, լավ եմ ինձ զգում։ Ինչ տրամադրվածությամբ, որ եղել եմ անազատության մեջ, այդ տրամադրվածությունով էլ դուրս եմ եկել։ Շարունակում եմ մնալ իմ գաղափարներին հավատարիմ։ Այս մասին այսօր MediaHub.am-ի հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանի որդին՝ Տարոն Մանուկյանը՝ խոսելով կալանքից ազատվելու մասին։
Հիշեցնենք, որ Տարոն Մանուկյանն ու Գոռ Սարգսյանը կալանավորված էին 2022 թվականի մայիսից։
«Ընկճվածություն ու հետ կանգնելու միտք չունեմ»,-ասաց նա։
Անդրադառնալով ԵՊՀ-ից դուրս մնալուն, Մանուկյանը վստահություն հայտնեց, որ տեղի ունեցածը պարզապես վատություն անելու փորձ էր ռեկտորի կողմից։
«Քննությունները կազմակերպելու համար բոլոր հնարավորությունները կային, առաջին դեպքը չէր պրակտիկայում։ Բայց ազատ արձակվելս ու համալսարանից դուրս մնալը իրար հետ չեմ կապում, որովհետև համալսարանից դուրս թողնելը շուտ էր որոշվել»,-նշեց Մանուկյանը։
Ստեղծված իրավիճակի ու պայքարի մասին խոսելիս՝ Մանուկյանն ընդգծեց, որ շատ բարդ իրավիճակ ունենք, և պայքարը վերջնական նպատակին հասցնելը հեշտ գործ չէ, այն դեպքում, երբ թշնամին այսքան մոտ է ՀՀ սահմանին։
«Մոտ ապագայում իրավիճակը կփոխվի ու մեր պայքարը տեղ կհասնի»,- հավելեց նա։
Հիշեցնենք, որ ըստ Քննչական կոմիտեի տարածած հաղորդագրության՝ քննությամբ ձեռք բերված փաստական տվյալների համաձայն՝ 2022 թ․ մայիսի 8-ին՝ ժամը 12:30-ի սահմաններում Գյումրի քաղաքի Երեւանյան խճուղում գտնվող հասարակական տրանսպորտի կանգառ, ավտոերթի մասնակիցները նշված կանգառում կանգնած՝ ավտոերթի ընթացքին հետեւող տարեց տղամարդկանց կոչ են արել միանալ իրենց: Ստանալով բացասական պատասխան՝ երիտասարդները վիրավորական արտահայտություններ են հնչեցրել, այնուհետեւ իջնելով ավտոմեքենայից՝ մոտեցել են հիշյալ տարեց տղամարդկանց, սկսել են վիճաբանել նրանց հետ, հայհոյանքներ են հնչեցրել, ձեռքերով եւ ոտքերով հարվածներ հասցրել նրանց մարմնի տարբեր մասերին: Ձեռք բերված բավարար ապացույցների համակցությամբ՝ 7 անձի՝ Գոռ Սարգսյանին, Արսեն Մարտիրոսյանին, Տարոն Մանուկյանին, Հոսիեկ Սարկիսյանին, Գոռ Մաթեւոսյանին, Գեւորգ Մուրադյանին եւ Վելիխան Խլղաթյանին մեղադրանք է առաջադրվել՝ ՀՀ քրեական օրենսգրքի 258-րդ հոդվածի 3-րդ մասի 1-ին կետով:
Լիաննա Թորոսյան