Գետամեջ տանող ճանապարհին կա սողանքի մեծ վտանգ. ի՞նչ են անում պատկան մարմինները

Կոտայքի մարզի Գետամեջ համայնք տանող ճանապարհը անձրևից հետո վնասվել է, և կա սողանքի մեծ վտանգ։ Այս մասին ահազանգում են Գետամեջի բանկիչները, որոնց մեջ շատ կան արցախցիներ։

Նրանցից մեկը MediaHub-ի հետ զրույցում ասաց, որ սողանք է սկսվել, որի հետևանքով ճանապարհի երթևեկելի մասը մասամբ փակվել է։

«Դեպի գյուղ տանող ճանապարհին ամեն անձրևից հետո սողանք է սկսվում և 10-15 սմ նեղանում է, էսօրվա դրությամբ արդեն մնացել է մի մեքենայի տեղ։ Բայց վերջին անձրևից հետո էլի է նեղացել, էդ մի մեքենայի տեղն էլ է պակասում արդեն։ Սողանքի լայնությունը մոտ 70-80 մետր է ու վերևից գալիս ճանապարհը փակում է, մտնում ճանապարհի տակ, ասֆալտը քանդում, էդ ճանապարհի տակ էլ ահագին տներ կան»,- ասաց Գետամեջի բնակիչներից մեկը։

Նրա խոսքով՝ շատ վտանգավոր իրավիճակ է ստեղծվել, և եթե այսպես շարունակվի և պատկան մարմինները սողանքը չկանգնեցնեն, ապա իրավիճակն ավելի աղետալի կդառնա՝ ուղիղ վտանգ սպառնալով հարակից տներին։

MediaHub-ը դիմեց նաև ՆԳՆ-ին` ճշտելու, թե տեղյա՞կ են, արդյոք, Գետամեջում ստեղծված իրավիճակից:

ՆԳՆ-ից պատասխանեցին հետևյալը. «Ապրիլի 25-ին ՆԳՆ Փրկարար ծառայությունում ստացվել է ահազանգ, նշված վայր է մեկնել մարտական հաշվարկ, և տեղեկատվությունը փոխանցվել է շահագրգիռ մարմիններ։ Նշանակվել են նաև հավելյալ ուսումնասիրություններ»:

Վահե Մակարյան