Լիզ Թրասը Մեծ Բրիտանիայի նոր վարչապետն է և Պահպանողական կուսակցության առաջնորդը:
Այսօր՝ սեպտեմբերի 5-ին, բրիտանական իշխող ուժի ղեկավարությունը հրապարակեց կուսակցության անդամների քվեարկության արդյունքները: 47-ամյա Թրասի օգտին է քվեարկել կուսակիցների ավելի քան 57 տոկոսը, այսինքն իշխող ուժի ավելի քան 80 հազար անդամ, ֆինանսների նախկին նախարար Ռիշի Սունակին ձայն է տվել մոտ 60 հազար պահպանողական։
Թրասը Մեծ Բրիտանիայի երրորդ կին վարչապետն է Մարգարեթ Թետչերից և Թերեզա Մեյից հետո։
Վարչապետի պաշտոնում որպես առաջին քայլ Լիզ Թրասը խոստացել է նվազեցնել հարկերը, անհապաղ լուծում առաջարկել էներգակիրների պատճառով առաջացած ճգնաժամը հաղթահարելուն։
47-ամյա Թրասը Օքսվորդի շրջանավարտ է: Նա սովորել է տնտեսագիտություն, քաղաքագիտություն ու փիլիսոփայություն։ Քաղաքական կարիերայի վերելքը մեկնարկել է խորհրդարանից, որտեղ Թրասը հայտնվել է միայն երրորդ փորձից հետո։
2014 թվականին Լիզ Թրասը Դեյվիդ Քեմերոնի կաբինետում դարձել է ամենաերիտասարդ կին նախարարը:
2000 թվականին Էլիզաբեթ Թրասն ամուսնացել է ֆինանսական տնօրեն Հյու Օ'Լիրիի հետ: Ունեն երկու զավակ։
Ռեբեկա Հովհաննիսյան