Արցախը և արցախցին փորձադաշտ չէ ինքնաներկայացման և խաղերի համար։ Արցախցիները արժանապատիվ մարդիկ են, մի խաղացեք նրանց զգացմունքներով։ Այս մասին Facebook-ի իր էջում գրել է Արցախի առողջապահության նախկին նախարար Միքայել Հայրիյանը:
«Ընդամենը ամիսներ առաջ Ռուբեն Վարդանյանը ցուցադրաբար հրաժարվեց Ռուսաստանի Դաշնության քաղաքացիությունից և եկավ Արցախ՝ «մեզ փրկելու» նպատակով։ Առանց հնարավոր ռիսկերն ու խնդիրները գնահատելու, առանց աշխարհաքաղաքական որևէ կենտրոնից աջակցության, հավանաբար որոշակի ուժերի սպասարկելու և հեռագնա այլ նպատակներով Ռ.Վարդանյանը տեղափոխվել է Արցախ ու կարգվել մեզ որպես «երկրորդ նախագահ»։
Ընդամենը երեք ամիս անց մենք համոզվեցինք հետևյալում.
1.Ռուբեն Վարդանյանը ռուսական ծրագիր չէ, որովհետեւ ռուսական ծրագիրը չէր կարող ուղղված լինել Արցախը կործանելուն.
2. Ներկայանալով որպես ռուսական ծրագիր, Ռ.Վարդանյանը մեր դեմ է տրամադրել մնացյալ աշխարհին.
3. Մի քանի հրապարակային խոսքով Ռ.Վարդանյանը քարուքանդ է արել Արցախի համեստ տնտեսությունը, պետական համակարգը, թուլացրել բոլորին գրեթե դիմադրողականության անկման աստիճանի (թե ում է ձեռնտու այս վիճակը, ակնհայտ է)։ Այս պահին մեր երկրի կրած վնասները միլիոնավոր դոլարի են հասնում։
4. Ունենք պետական պաշտոնյա, ով պիտի գոնե չխոսի, որպեսզի չունենանք ավելի վատ վիճակ.
5. Արցախի պաշտոնյան իր հրապարակային խոսքով օրակարգ է մտցրել Արցախը լքելու կամ Ադրբեջանի տիրապետության տակ ապրելու թեզեր (այդ և հիպոթետիկ այլ տարբերակները արցախցիները բոլորից լավ գիտեն), որոնք արցախցիները երբեք չեն էլ քննարկել։
6. Ունենք պետական նախարար, ում պաշտպանության հիմնական թեզը Ադրբեջանի կողմից ընդունված չլինելու կեղծ պատրվակն է։ Դրանից լավ պաշտպանության միջո՞ց”,- գրել է նախկին նախարարը։
MediaHub-ը հիշեցնում է, որ Հայրիյանն առաջինը չէ, ով հրապարակավ քննադատում է Ռուբեն Վարդանյանին: Նախօրեին Արցախի տարածքային կառավարման և ենթակառուցվածքների նախկին նախարար Հայկ Խանումյանը, որն առաջիններից, ում զբաղեցրած պաշտոնից ազատեց Ռուբեն Վարդանյանը, դառնալով Արցախի պետնախարար, խախտել էր լռությունը: Նա, մասնավորապես, գրառում էր արել՝ առանց անուններ տալու, բայց և ընդհանուր առմամբ չքողարկելով, որ հասցեատերը Ռուբեն Վարդանյանն է: Վերջինիս նա, փաստացի, որակում է ինքնասիրահարված, փառքի հասնելու մոլուցքով տառապող անձնավորություն, ում համար Արցախն ուղղակի հերթական նախագիծն է:
Արցախի ԱԳ նախկին նախարար Դավիթ Բաբայանն էլ այսօր գրառում է արել, որից այդքան էլ պարզ չէ, թե ով է հասցեատերը, բայց ենթադրելի է, որ ուղղված է քննադատությունը դարձյալ Վարդանյանին: Բաբայանը, մասնավորապես, գրել էր.
«Բացի այդ, միանգամայն ակնհայտ է, որ մենք պետք է հեռու մնանք բղավողներից ու պարծենկոտներից, ավելին, նման տարրերը պետք է հնարավորինս հեռու պահել պետական կառավարման համակարգից։ Այստեղ գլխավորն այն է, որ պարկեշտ մարդիկ այլևս չպետք է ամաչկոտ լինեն և չափից դուրս համեստություն ցուցաբերեն։ Մենք մեր պատմության ամենաճակատագրական ժամանակաշրջանում ենք, և հայրենասերները պետք է համախմբվեն, խարանել և չեզոքացնեն կեղծ մարգարեներին, դեմագոգներին և սրիկաներին»:
Արցախը 43-րդ օրն է շրջափակված է: Հումանիտար աղետին գումարվել է ամեն օր խորացող ու ահագնացող ներքաղաքական ճգնաժամը: