Մասկը պատահականության սկզբունքով կստուգի թվիթերյան 100 օգտահաշիվ
Միլիարդատեր Իլոն Մասկը հայտնել է, որ իր թիմը կստուգի թվիթերյան 100 պատահական օգտահաշիվ՝ պարզելու, թե արդյոք դրանք կեղծ են, գրում է ՏԱՍՍ-ը:
Ավելի վաղ Մասկը հայտարարել էր Twitter սոցիալական ցանցը 44 մլրդ դոլարով գնման գործարքի կասեցման մասին՝ սպասելով տվյալների ստուգմանը, որ կեղծ օգտահաշիվները կազմում են օգտատերերի 5%-ից պակասը։
«Դա պարզելու համար իմ թիմը պատահականության սկզբունքով կստուգի Twitter-ի 100 օգտատիրոջ»,- գրել է Մասկը Twitter-ում՝ առաջարկելով «մյուսներն անել նույնը»: Նախկինում նա հայտարարել էր սոցցանցում սպամ օգտահաշիվների դեմ պայքարելու իր մտադրության մասին։
Ապրիլի 25-ին Twitter-ի ղեկավարությունը հայտարարեց, որ Մասկը ձեռք կբերի ընկերությունը 44 միլիարդ դոլարով: Ըստ ԱՄՆ արժեթղթերի և բորսաների հանձնաժողովի, եթե միլիարդատերը որոշի խզել պայմանագիրը, նա պետք է ընկերությանը վճարի 1 միլիարդ դոլար տուգանք: Եթե Twitter-ը նախաձեռնի խզում, փոխհատուցումը կստանա Մասկը։ Գործարքի փակման ժամկետ է սահմանվել 2022 թվականի հոկտեմբերի 24-ը:
