Ինչպես ավելի վաղ MediaHub-ը գրել էր՝ տելեգրամյան ալիքներից մեկն այսօր լուր էր տարածել, թե Սոչիում կայանալիք Պուտին-Փաշինյան-Ալիև եռակողմ հանդիպմանը մոսկովյան կողմը ցանկանում է հրավիրել նաև Արցախի նախագահին:
Ընդ որում, լուրը ներկայացվում էր այնպես, թե հայկական կողմն է առարկում նման հանդիպման անցկացմանը: Լուրի իսկությունը ճշտելու նպատակով MediaHub-ը հարցում ուղղեց Արցախի նախագահ Արայիկ Հարությունյանի խոսնակ Լուսինե Ավանեսյանին: Վերջինս պատասխանեց լակոնիկ.
«Մենք նման տեղեկություն չունենք»:
Հիշեցնենք, որ ավելի վաղ լուրեր շրջանառվեցին, թե Արցախի իշխանությունները մտադիր են պատվիրակություն գործուղել նաև ՌԴ, երևանյան հանդիպումներից հետո, քանի որ ՀՀ-ում իրենց հնչեցրած հարցերի լիարժեք պատասխաններ չեն ստացել: Ուշագրավ է, որ ՔՊ-ական որոշ պատգամավորներ կասկածում են, թե հանդիպումն առհասարակ կկայանա: Մասնավորապես, ՔՊ խմբակցության պատգամավոր Գագիկ Մելքոնյանն այսօր լրագրողների հետ ճեպազրույցում նման կասկած է հայտնել.
«Հնարավոր է հանդիպումը չկայանա, քանի որ դեռևս պաշտոնական առաջարկ չի եղել»,- ասել էր նա:
Ի դեպ, տելեգրամյան աղբյուրը, որի հավաստի լինելը այս դեպքում չենք քննարկում, պարզապես մեջբերում ենք, ի հավելում այս կասկածների գրել էր, թե իշխանություններն այժմ քննարկում են Նիկոլ Փաշինյանի «հիվանդանալու» տարբերակը: