Հայաստանի մեդիառեսուրսների վրա Արևմուտքի աճող ազդեցությունը, ինչպես ցանկացած այլ երկրի, ոչ մի լավ բանի չի կարող հանգեցնել: Այսպես է արձագանքել Ռուսաստանի արտաքին գործերի նախարարության տեղեկատվության և մամուլի դեպարտամենտի փոխտնօրեն Անդրեյ Նաստասինն այն հարցին, որ «Ազատություն» ռադիոկայանի երկարամյա աշխատակիցը դարձել է Հայաստանի հանրային ռադիոյի տնօրեն։
«Ամերիկացիներն ու ԵՄ-ականները պատեհապաշտ են գործում՝ նպատակ ունենալով ամենուր հասարակական կարծիքը շրջել Ռուսաստանի դեմ։ Նրանք նաև ցանկանում են նսեմացնել ռուս-հայկական դարավոր բարեկամության և այն օգնության կարևորությունը, որը Մոսկվան ցուցաբերել և ցուցաբերում է եղբայրական Հայաստանին բոլորովին այլ ոլորտներում»,- ասել է Նաստասինը։
Ըստ նրա՝ Մոսկվան ու Երևանը զանգվածային հաղորդակցության ոլորտում ունեն փոխգործակցության հաստատված մեխանիզմներ, և կան շփումներ լրագրողների միջոցով։ «Անցյալ տարի տեղի են ունեցել արտաքին գործերի նախարարությունների միջգերատեսչական խորհրդակցություններ ԶԼՄ-ների հետ աշխատելու վերաբերյալ»։