Նախօրեին Նիկոլ Փաշինյանի կատարած այցը դեպի Սյունիքի մարզ լուրջ մտահոգությունների տեղիք տվեց։ Սյունեցիները ենթադրեցին՝ գալիս է, որովհետև սահմանազատման հաջորդը փուլը իրենց մարզո՞ւմ է մեկնարկելու:
Ինչո՞ւ մեկնեց, ի՞նչ նպատակով, և ի՞նչ են մտածում տեղի բնակիչները այդ ամենի մասին. MediaHub-ը փորձեց ստանալ այս հարցի պատասխանները` խոսելով Արցախից տեղահանված և Գորիսում բնակություն հաստատած բնակիչներից մեկի հետ, որն այստեղ փորձում է մեղմել հայրենիքի կարոտը: «Այստեղ մեզ հարցնում են՝ «հարմարվե՞լ եք», ասում եմ՝ «հարմարվել ենք այնքան, որ խոսում ենք մեր բարբառով ու ապրում ենք մեր քաղաքի նման հանգիստ քաղաքում»»,- ասաց մեր զրուցակիցը։
Փաշինյանի այցը Գորիս բնակչության մեծ մասի մոտ տագնապալից տրամադրություններ է առաջացրել։ «Խոսելով սահմանազատման մասին՝ բնակիչների մեծ մասը, բայց ոչ բոլորը, իհարկե, չեն հավատում խաղաղությանը, քանի որ կարող է այնպես ստացվել, որ թշնամին մոտիկանա քաղաքին»,- ասաց նա:
Նա նշեց, որ վախ սյունեցիների շրջանում կա, բայց չեն ցանկանում ընդունել դա։
«Ամեն ինչ պետք է զգաս քո մաշկի վրա, որ հասկանաս: Այս մարդիկ որտեղի՞ց հասկանան, թե հիմա ինչ է զգում տավուշեցին, ում հայրենիքը մաս-մաս հանձնում են, ինչ էր զգում այն ժամանակ արցախցին, երբ Արցախին նայեց վերջին ու կարոտալի հայացքով»,- նշեց նա։
Մեր զրուցակիցը հիշեց, որ իրեն մի անգամ հարցրել են՝ եթե այստեղ պատերազմ լինի, ի՞նչ կանեն, ինչին ամուսինը պատասխանել է. «Մասնակցել եմ երկու պատերազմի ու եթե, Աստված չանի, այստեղ ևս լինի պատերազմ, ես կգնամ և այստեղ ևս կկանգնեմ՝ հայրենիքը պաշտպանելու նպատակով»:
Նշենք, որ Գորիսն այսօր, փաստացի, երեք կողմից շրջափակված է, Ադրբեջանը ցանկանում է Ջերմուկն անջատել Գորայք հատվածից, և եթե հաջողվի, ապա ամբողջ Սյունիքի մարզը կհայտնվի բլոկադայի մեջ, ինչպես Արցախը: Այս վտանգը զգալով՝ Հայաստանի գիտակից հատվածն արդեն ահազանգում է։
«Այս ամենը նկատի ունենալով՝ կան մարդիկ, ովքեր ադեկվատ են մտածում ու հասկանում, ինչի է բերելու այս ամենը, հետևապես մտահոգ են ու վախեցած»,- ասաց մեր զրուցակիցը՝ հավելելով, որ արտագաղթելու տրամադրություններ, սակայն, այս պահին չի նկատում:
«Հուսամ՝ չեմ էլ նկատի, քանի որ դա կփաստի մեր ազգի դժվարին ու պարտվողական վիճակը»,- հավելեց նա:
Վիկա Աբգարյան