Դեմոկրատները պահանջել են, որ Telegram-ը հանձնի բոլոր տվյալները Կապիտոլիումի գրոհից հետո․ Դուրով (տեսանյութ)
2021 թվականի հունվարին Կապիտոլիումի գրոհից հետո «Տելեգրամ» մեսենջերի ղեկավարությունը դիմում է ստացել Միացյալ Նահանգների Դեմոկրատական կուսակցության ներկայացուցիչներից՝ անկարգությունների վերաբերյալ տվյալներ տրամադրելու խնդրանքով։ Այս մասին մեսենջերի համահիմնադիր Պավել Դուրովը խոսել է ամերիկացի լրագրող Թաքեր Քառլսոնին տված հարցազրույցում։
Նրա խոսքով՝ ավելի ուշ Հանրապետականները գրել են «Տելեգրամին», որ Դեմոկրատներին տվյալների տրամադրումը համարում են խախտում։
Ըստ Պավել Դուրովի՝ նամակով Դեմոկրատ կոնգրեսականը պահանջել է տրամադրել ողջ տեղեկատվությունը Կապիտոլիումի գրոհի մասին։ «Մենք խորհրդակցեցինք մեր փաստաբանների հետ, և նրանք մեզ խորհուրդ տվեցին անտեսել այն, թեև նամակը շատ լուրջ էր թվում, և ասվում էր, որ պահանջը չկատարելը կլինի ԱՄՆ Սահմանադրության խախտում», - ասել է գործարարը։
Հանրապետական կուսակցության խնդրանքը հասել է երկու շաբաթ անց։ «Մենք Կոնգրեսում Հանրապետական կուսակցության ներկայացուցիչներից ևս մեկ նամակ ենք ստացել, որտեղ ասվում է, որ եթե մենք տրամադրենք տվյալները, ապա կխախտենք ԱՄՆ Սահմանադրությունը»,- պարզաբանել է Telegram-ի համահիմնադիրը։
«Այսպիսով, մենք երկու նամակ ենք ստացել, որից հետևել է՝ ինչ էլ անենք, դա կլինի ԱՄՆ Սահմանադրության խախտում»,- ընդգծել է նա։
Պավել Դուրովը հարցազրույցում խոսել է նաև ԱՄՆ Հետաքննությունների դաշնային բյուրոյի կողմից չափազանց մեծ ուշադրության մասին։ Նրա խոսքով՝ ամերիկյան հետախուզական ծառայությունները փորձել են իրենց կողմը քաշել հաղորդակի ինժեներներից մեկին։ Գործարարը նաև ասել է, որ չի հավատում ամերիկյան հարթակների անվտանգությանը, իսկ «ԱՄՆ-ում բնակչությանը լրտեսելը բացատրվում է անվտանգությամբ»։
Գործարարն ընդգծել է, որ համաձայնել է զրույցին՝ հանդիսատեսի հետ օբյեկտիվ լինելու համար, քանի որ ամերիկացի լրագրող Թաքեր Քառլսոնը հայտնի է իր պահպանողական հայացքներով։
