Երեկ Աստանայում կայացել է Ռուսաստանի ու Հայաստանի ԱԳ նախարարների հանդիպումը:

Միրզոյան-Լավրով այս հանդիպումն առաջինն էր հայ-ադրբեջանական սահմանի վերջին լարվածությունից ու Ռուսաստանի հասցեին Երևանից ամենաբարձր մակարդակով հնչող քննադատություններից հետո։

Ընդհանուր առմամբ, այս տրենդը շարունակվել է նաև երեկվա հանդիպման ժամանակ. Լավրովն առաջարկել է Մոսկվայի միջնորդությունը, Միրզոյանն ակնարկել է, թե Երևանը Մոսկվայից ավելի մեծ ակնկալիքներ ունի:

ՀԱՊԿ-ը պատրաստ է իր դիտորդներին ուղարկել Հայաստան, ասել է Ռուսաստանի արտգործնախարարը: Կառույցի անգործության մասին Երևանից հնչող քննադատությունների ֆոնին՝ Լավրովը պնդել է՝ դրա համար անհրաժեշտ է միայն Հավաքական անվտանգության խորհրդի որոշումը, որտեղ այժմ Հայաստանն է նախագահում։ Սրան ի պատասխան՝ Միրզոյանը հասկացրել է, որ դիտորդներ ուղարկելու է Եվրամիությունը, իսկ Մոսկվայից ակնկալվում է աջակցություն:

«Բարձր ենք գնահատում նախագահ Պուտինի և Ռուսաստանի ներդրումը Ադրբեջանի հետ խաղաղության հաստատման և հարաբերությունների կարգավորման գործում: Դրան զուգահեռ, մենք տեսնում ենք, որ ադրբեջանական ախորժակը միայն աճում է։ Խոսքը միայն Լեռնային Ղարաբաղի մասին չէ, թեև այնտեղ խնդիրները չեն լուծվել, այլև՝ Հայաստանի ինքնիշխան տարածքների։ Հայաստանը Ռուսաստանի ռազմավարական գործընկերն է, և այստեղ ակնկալում ենք Ռուսաստանի հստակ դիրքորոշումը», - ընդգծել է Միրզոյանը։

Մոսկվան, մինչդեռ, գերադասում է հավատարիմ մնալ պարիտետային վարքագծին ու ընդամենը փաստում է, որ Երևանին ու Բաքվին համապարփակ առաջարկություններ ունի, որոնք քննարկելու նպատակով՝ մտադիր է նախաձեռնել Պուտին- Փաշինյան- Ալիև եռակողմ հանդիպում:

Տպավորություն է, որ Լավրովն ու Միրզոյանը խոսում էին տարբեր լեզուներով:

Ի՞նչ պատկեր ունենք այս պահին:

Արևմուտքը հրաժարվում է իր էներգետիկ գործընկեր Ադրբեջանի դեմ պատժամիջոցներ կիրառել, իր դեմքը փրկելու համար մի համեստ դիտորդական առաքելություն է առաջարկում՝ Հայաստանի սահմաններից ներս, ու Երևանը հենց այս «բագաժով» է ներկայանում Լավրովի հետ հանդիպմանը: Երբ Արևմուտքից կոնկրետ անվտանգային առաջարկներ չեն հնչում, մեղմ ասած՝ մտահոգիչ է, երբ Լավրով- Միրզոյան հանդիպումն ընդամենն արտացոլում է հայ-ռուսական հարաբերություններում առկա ճգնաժամը՝ առանց դրա հաղթահարման դեղատոմս առաջարկելու:

Վահրամ Բագրատյան