Կա պայմանավորվածություն մինչև տարեվերջ Ադրբեջանի հետ ստորագրել խաղաղության պայմանագիր, դելիմիտացնել հայ-ադրբեջանական սահմանը, Հանրային հեռուստատեսության եթերում նախօրեին հայտարարել է Հայաստանի անվտանգության խորհրդի քարտուղար Արմեն Գրիգորյանը։
«Հայաստանի և Ադրբեջանի սահմանը դելիմիտացիայի ենթարկվել է 1929 թվականին և կարելի է ասել Հայաստանի և Ադրբեջանի դելիմիտացիոն գործընթացը ավարտվեց այստեղ, մնում է մենք փոխադարձ համաձայնության գանք, որ դա ընդունում ենք որպես հիմք, ապահովագրենք Հայաստանի 29 հազար 800 քառակուսի կիլոմետր տարածքը և առաջ շարժվենք», - նշել է Գրիգորյանը:
Իհարկե, դժվար է պատկերացնել, թե ինչպես է մինչև տարեվերջ դելիմիտացիան տեղի ունենալու, եթե նկատի ունենանք հայ- ադրբեջանական հարաբերությունների բարդ բնույթը ու այն ակնհայտ փաստը, որ երկու երկրների սահմանը 1000 կմ-ից ավելի է:
Այս հարցերի պատասխանները Գրիգորյանը չի տալիս: Ավելին, ակնհայտ է դառնում, որ պաշտոնական Երևանը նահանջել է իր կարևոր պահանջից. փաստորեն խաղաղության պայմանագիր կնքվելու է՝ առանց Ադրբեջանի իրականացրած օկուպացիայի հետևանքների վերացման: Այդ մասին որևէ հիշատակում չկար ոչ Գրիգորյանի հարցազրույցում և ոչ էլ՝ Պրահայի քառակողմ հայտարարության տեքստում:
Մյուս կողմից, հայկական կողմը էական նահանջ է կատարել ԼՂ խնդրում:
Եթե 2021թ-ի խորհրդարանական ընտրություններում ՔՊ-ն առաջին պլան էր բերել ԼՂՀ անկախության օրակարգը, Շուշիի ու Հադրութի դեօկուպացիայի պահանջը, ապա արդեն այս տարվա ապրիլին Նիկոլ Փաշինյանը ԱԺ ամբիոնից խոսում էր ԼՂ խնդրում «նշաձողի իջեցման անհրաժեշտության մասին»՝ շեշտը դնելով ԼՂ ժողովրդի իրավունքների ու անվտանգության մասին:
Պարզվում է՝ հիմա նշաձողն ավելի է իջեցված ու Հայաստանը մտադիր է Ադրբեջանի հետ պայմանագիր ստորագրել՝ առանց ԼՂ խնդրի հիշատակման:
«Բանակցությունների մոտեցումն այն է, որ խաղաղության պայմանագրով մենք կարգավորում ենք Հայաստան-Ադրբեջան հարաբերությունները, իսկ Լեռնային Ղարաբաղի մասով մենք շարունակում ենք բանակցել ինչպես մեր գործընկերների հետ, այնպես էլ բոլոր խաղացողների հետ, որպեսզի ստեղծենք միջազգային մեխանիզմ Լեռնային Ղարաբաղի և Ադրբեջանի միջև իրավունքների և անվտանգության հարցերը քննարկելու մասով», - ընդգծել է Գրիգորյանը:
Բաքվից արդեն արձագանքել են Արմեն Գրիգորյանին։ Նրա հետ հանդիպումներ անցկացնող Ադրբեջանի նախագահի խորհրդական Հիքմեթ Հաջիևը պնդել է՝ Ղարաբաղի հայերի հետ շփման միջազգային մեխանիզմ ստեղծելու մասին խոսք լինել չի կարող։ Ե՛վ Բրյուսելում, և՛ Վաշինգտոնում ադրբեջանական կողմը հատուկ ընդգծել է՝ որևէ երրորդ կողմի հետ չի պատրաստվում քննարկել իր երկրի սուվերեն իրավունքներին վերաբերող հարցեր, Ղարաբաղի բնակիչների իրավունքների և անվտանգության հարցերը կլուծվեն Ադրբեջանի սահմանադրության համաձայն։
Ըստ ամենայնի, գործ ունենք մի իրավիճակի հետ, երբ պաշտոնական Երևանը «ձեռքերը լվանում» է Արցախից:
Վահրամ Բագրատյան