Ընդդիմության շարունակական պայքարի ու համառ հանրահավաքների շղթան կարող է կտրվել։ Իշխանության դեմ պայքարող քաղաքացիները 2020 թվականի նոյեմբերի 9-ին կապիտուլյացիոն ակտի ստորագրումից հետո ընդդիմությունից հստակ քայլեր են սպասում. ընդդիմությունը կհիասթափեցնի՞ հանրությանը։ Վաղը՝ նոյեմբերի 9-ին հանրահավաք չի նախատեսվում։

«Հայաստան» խմբակցության պատգամավոր Սեյրան Օհանյանը MediaHub.am-ին փոխանցեց, որ ընդդիմությունը նախատեսել է «Հայաստանի իրական օրակարգը» թեմայով քննարկում. «Անի գրանդ հոթելում է քննարկումը լինելու»,-ասաց նա։

Հիշեցնենք, որ նոյեմբերի 5-ի հանրահավաքից հետո Իշխան Սաղաթելյանն արձանագրեց, որ՝ «Պարտությունները, անհաջողությունները միայն թույլերի համար կարող են պայքարից հրաժարվելու առիթ դառնալ։ Հայաստանը երեկ արձագանքեց Արցախի կոչին, Արցախում և ամբողջ աշխարհում երեկ լսեցին այդ արձագանքը․ այս պահին դա կարևոր էր, և մենք դա արեցինք միասին։

Այստեղ միայն ցանկանում եմ վերահաստատել բազմաթիվ անգամներ հնչեցրած տեսակետը, որը մեր համոզմունքն է․ մենք մեր կռիվը մինչև վերջ տալու ենք և բոլոր ուժերով ու ռեսուրսներով կանգնել ու կանգնելու ենք հանուն Արցախի և Հայաստանի ցանկացած նախաձեռնության կողքին։ Առջևում մեր ապրելու համար կռիվն է և մենք պետք է հաղթենք այդ կռվում»:

Հատկանշական է, որ նոյեմբերի 9-ին Նիկոլ Փաշինյանը նույնպես «պլաններ չունի»... գոնե այս պահին:

MediaHub.am-ի աղբյուրի փոխանցմամբ՝ Փաշինյանը դեռ որոշում չունի՝ Եռաբլուր այցելելու է, թե՝ ոչ։

Լիաննա Թորոսյան