Ի՞նչ է քննարկել Պուտինի ներկայացուցիչն ԱՄՆ-ում
ՌԴ նախագահի ներկայացուցիչ, Ռուսաստանի ուղիղ ներդրումների հիմնադրամի ղեկավար Կիրիլ Դմիտրիեւը խոսել է Վաշինգտոնում անցկացված բանակցությունների արդյունքների մասին։
Նա նշել է, որ հանդիպել է ԱՄՆ նախագահ Դոնալդ Թրամփի վարչակազմի «կարևոր անդամների» հետ:
Նրա խոսքով՝ ԱՄՆ-ն «լսում է Ռուսաստանի դիրքորոշումը» և պատրաստ է երկխոսության։
Ոչ պաշտոնական տեղեկություններով՝ նա զրուցել է Թրամփի հատուկ ներկայացուցիչ Սթիվ Ուիտկոֆֆի հետ:
«Թրամփի վարչակազմը, ի տարբերություն Բայդենի, հակված է խնդիրների լուծմանը: Նրանք վարվում են չափազանց հարգալից, հաշվի են առնում Ռուսաստանի դիրքորոշումը, շատ հարցեր են տալիս և փնտրում են փոխզիջումներ»,- ասել է նա լրագրողներին:
Դմիտրիեւի խոսքով՝ բանակցությունների գլխավոր թեմաներից մեկը եղել է ռուս-ամերիկյան հարաբերությունների վերականգնումը:
ՌԴ նախագահի ներկայացուցիչը նաև անդրադարձել է Ռուսաստանի և ԱՄՆ-ի միջև ուղիղ ավիահաղորդակցությունը վերականգնելու հնարավորությանը։ «Փաստացի, աշխատանքներ են տարվում ուղիղ ավիահաղորդակցությունը վերականգնելու ուղղությամբ, և մենք հույս ունենք առաջընթաց գրանցել»,- նշել է նա։
Դմիտրիեւն ընդգծել է, որ դեռևս մի շարք հանդիպումներ կպահանջվեն՝ բոլոր տարաձայնությունները լուծելու համար։
